2017 წელს ბაღის დიზაინში ფართოდ გავრცელებულია ბალიშების გამოყენება, რომლებიც ფერადი პრინტით ხასიათდება. ბაღის ავეჯისთვის კი პოპულარული მასალა ბუნებრივი, მოქსოვილი მატერიაა. ეს უკანასკნელი თქვენს სივრცეში რეტრო ატმოსფეროს შემოიტანს, ამიტომ დაივიწყეთ პლასტიკური ხე, თუ გამომწვარი რკინა. აქვე, მოზაიკური მაგიდებიც არ კარგავენ პოპულარობას. ისინი შეიძლება იყოს ბუნებრივი ქვისგან, კერამიკისა თუ მინისგან დამზადებული. სწორად და სტრატეგიულ ადგილას დადებული ბაღის სკამები დეკორატიულად და სახალისოდ გამოიყურება. ბაღის დეკორში აუცილებლად შადრევნებიც შემოიტანეთ. ისინი მშვიდ ატმოსფეროს ქმნიან, რაც თქვენი რელაქსაციისთვის არაჩვეულებრივი ვარიანტი იქნებოდა. ფერადი პატერნის ხალიჩები ასევე ერთ-ერთი ტრენდული აქსესუარია 2017 წლის ბაღისთვის. აქსესუარების ფერები კი ცისფერსა და მწვანეს შორის მერყეობს. ეს ფერები ზღვასა და ოკეანეს მოგაგონებთ. ბუნებით ინსპირირებული ფერები ჩვენს სიმშვიდესაც, თავისთავად, ხელს უწყობს.

ბაღის ყველაზე საინტერესო დეკორად გარე განათება გვევლინება. ნათურების დაკიდვის უამრავი კრეატიული გზა არსებობს. მაგალითად, შეგიძლიათ ისინი ხეებს შორის დაკიდოთ, მათ ქვემოთ კი - ჰამაკი მოათავსოთ. ვინტაჟური კიბეების გამოყენებით მინი-პერგოლა შექმენით, სადაც ნათურებს ჩამოკიდებთ. ეს ბაღში სინათლეს კარგად გაავრცელებს და ვიზუალურადაც ულამაზესი იქნება. უკვე რამდენიმე წელია ხეებზე შემოხვეული ნათურები პოპულარობას არ კარგავს. 2017 წლისთვის კი ტრენდულია ნათურებისთვის ფერადი ქაღალდების, ქსოვილების, დროშების დამატება.