ჰაინსი, რომელიც თავადაც იყო იმ დროისთვის ახალი და უჩვეულო, ჰოლივუდური ფენის წევრი, სპეციალურად კინოვარსკვლავებისა და რეჟისორებისთვის ქმნიდა საცხოვრებელ გარემოს. იგი თითქოს ცდილობდა, რომ მსახიობი და დეკორატორი ერთ პროფესიაში გაეერთიანებინა, სახლი და კინოსტუდია კი ერთ სივრცეში მოექცია. მან, საზოგადოების განსაკუთრებული წარმომადგენლებისთვის, ახალი სტილი ცამოაყალიბა. მიუხედავად იმისა, რომ იდეა არც ისე კეთილშობილურია, იგი ზუსტად ისე მალე გახდა პოპულარული მთელს ამერიკაში, როგორც თავად კინოვარსკვლავები. 
ზოგადად ეს სტილი 1930 წლის შემდეგ ძალიან შეიცვალა, თუმცა იდეა იგივე დარჩა: ყველა დეტალი პრიალა, ბრჭყვიალა და მდიდრულია. ყველა ნიუანსში ჩანს, რომ აქ ვარსკვლავი ცხოვრობს. თავის დროზე, ასეთი ხასიათი ინტერიერში დაბალი, რიტმული ხასიათის ავეჯით გამოიხატებოდა, რომელიც თავის მხრივ ძვირფასი მატერიითა და ფოჩებით იყო გაწყობილი. ჰაინსი ცდილობდა ღიობები გრაციოზული, მასშტაბური ფარდებით დაეფარა, სათავსო კი ძირითადად ხელოვნური განათებით გაენათებინა. ჰოლივუდურმა სტილმა, ფუფუნება თითქოს კლასიცისტური არქიტექტურისგან ისესხა და ეს ყველაფერი უფრო გულუბრყვილო და უშუალო, მაგრამ ამავე დროს არარეალური გახადა.

ტიპიურ, ჰოლივუდური სტილის სახლში ფართო სათავსოები, პრიალა ზედაპირები და უამრავი სარკეა. თუ გსურთ, რომ საკუთარ საცხოვრებელში კლასიკური ფილმის ვარსკვლავივით იგრძნოთ თავი, უბრალოდ რაც შეიძლება მეტი ზედაპირი დაამუშავეთ ლაქით და უხვად გამოიყენეთ დეკორაცია. არ არის აუცილებელი, რომ ძვირადღირებული ნივთები შეარჩიოთ, ჰოლივუდი უბრალოდ გლამურულობის სურვილსაც დასჯერდება. ასე რომ, შეგიძლიათ მისაღები მეორადი ავეჯის მაღაზიაში შეძენილი სავარძლებით მორთოთ - მთავარია, რაც შეიძლება მეტი რბილი ზედაპირით გააწყოთ იგი.

კლასიკური ჰოლივუდის გლამური ძალიან მიმზიდველია ამრეკელი ზედაპირებით, ბრჭყვიალა ქვებით მორთული დეკორაციითა და ნათელი ფერებით, თუმცა თუ გადაწყვეტთ, რომ ინტერიერი ამ სტილში გააფორმოთ, ეცადეთ წინ საკუთრი გლამურული და თამამი გადაწყვეტილებები წამოსწიოთ - არ შეუშინდეთ კონტრასტსა და მრავალფეროვნებას. საცხოვრებელი სივრცე მხოლოდ თქვენს განსაკუთრებულობას უნდა უსვამდეს ხაზს.