ხეზე აშენებული სახლის ქონის შემთხვევაში ბავშვები სულ უფრო მეტ დროს ატარებენ გარეთ, უახლოვდებიან ბუნებას, ხდებიან ფიზიკურად უფრო აქტიურები, სწავლობენ გუნდურ მუშაობას და რისკებთან განმკლავებას. თუ თქვენ გადაწყვეტთ, რომ თქვენს შვილებს ხის სახლი აუშენოთ, აუცილებლად ჩართეთ ისინი მშენებლობის პროცესში. მათთან ერთად დაგეგმეთ სახლის დიზაინი და მშენებლობის თითოეული ეტაპი. ერთად შეარჩიეთ საჭირო მასალა, ფერი. მიეცით მათ გადაწყვეტილების დამოუკიდებლად მიღების საშუალება. ეს ყველაფერი დაგეხმარებათ მათთან კომუნიკაციის განმტკიცებაში, ოჯახური ურთიერთობების გაღრმავებაში. თქვენ შესძლებთ შვილებთან ერთად სასიამოვნოდ გაატაროთ დრო. ამავდროულად, ისინი აუცილებლად ისწავლიან პრობლემებთან განმკლავებას, საქმის დაგეგმვას, გუნდურად მუშაობას. ისინი შეეჩვევიან შრომას და უფრო მეტად გაუფრთხილდებიან მათივე აშენებულ სახლს.

ყველამ კარგად ვიცით, თუ როგორი აუცილებელია ბავშვის განვითარებისთვის ბუნებაში ყოფნა. დღეს ბავშვები დროს ძირითადად სახლში, კომპიუტერის წინ ატარებენ, რაც ძალიან უარყოფითად მოქმედებს მათ ფიზიკურ და მენტალურ ჯანმრთელობაზე. რაც უფრო აქტიურად და ჯანსაღ გარემოში ატარებს ბავშვი თავისუფალ დროს, მით უფრო ჯანმრთელია ის. მერწმუნეთ, ხეზე აშენებული სახლი მათ აუცილებლად დაახლოებს ბუნებასთან და მოანდომებს გარეთ თამაშს. ეს იქნება ადგილი, სადაც ისინი სიამოვნებით გაატარებენ თავიანთ დროს, გაერთობიან და იქნებიან აქტიურები. ამავდროულად, იქნებიან ფიზიკურად უფრო აქტიურნი, დაგეგმავენ სხვადასხვა თამაშებს მეგობრებთან ერთად. რაც მათ მენტალურ და ფიზიკურ ჯანმრთელობაზეც დადებითად აისახება.

ასე, რომ ნუ დაიზარებთ თქვენი ბავშვებისთვის ამ საოცნებო ადგილის შექმნას. თუ თქვენ გაქვთ კერძო ეზო და რამდენიმე ხე, თქვენ მარტივად შესძლებთ პატარა კონსტრუქციის გაკეთებას. გაითვალისწინეთ, რომ ხეზე აშენებული საბავშვო სახლი უსაფრთხო და მარტივი დიზაინის უნდა იყოს. ასე, რომ მოიმარაგეთ საჭირო მასალები და ოჯახთან ერთად შეუდექით საბავშვო სახლის მშენებლობას.