ქალაქში, სადაც უკვე განხორციელდა ჰაილაინის პროექტი, რომელმაც შეცვალა ლანდშაფტის ტრადიციული აღქმა და რაც მთავარია შეცვალა მთლიანად უბანი, ახლა პროექტი ლოულაინი (Lowline) ყალიბდება. ეს კი იმას ნიშნავს, რომ ახალგაზრდა არქიტექტორები, დიზაინერები და ურბანისტები ფიქრობენ მსოფლიოში პირველ მიწისქვეშა პარკზე. პირველი ნაბიჯები უკვე გადადგმულია: მანჰეტენის აღმოსავლეთით, (Lower East Side) მიტოვებული სუპერმარკეტის შენობის მიწისქვეშა ნაწილში განთავსდა ლოულაინ ლაბორატორია. სადაც სტუდენტებმა მცირე ფართში უკვე შეძლეს ერთგვარი კონცეფციის წარმოდგენა, მომავალი მიწისქვეშა პარკის შესახებ. ჯერ-ჯერობით, დამთვალიერებლების უმრავლესობის თანახმად ლოულაინის მონახულება არც ისე შთამბეჭდავია. ლაბორატორია სულ სარდაფის ორი დიდი ოთახისგან შედგება, მათგან უფრო მოზრდილში კი მიწისქვეშ უკვე გახარებული მცენარეები ერთადაა მოთავსებული. ისინი განათებულია და მათ სიახლოვეს, პარკის მსგავსად მოსასვენებელი სკამებია დალაგებული. ამის მიუხედავად, ლოულაინის სანახავად ესექსის ქუჩაზე მაინც დიდი რიგია.

უკვე გახარებულ მცენარეებს შორის ტროპიკული მცენარეები, გვიმრა, აჰავა, კაქტუსი, მარწყვი და სხვადასხვა ბოსტნეულიც კია. პარკის გაშენების ტექნიკური მხარე ძალიან დახვეწილი და საინტერესოა: უღიობო სივრცეში პარაბოლური სარკეებითა და ლინზებით იკრიბება მზი სინათლის საჭირო ენერგია და მისი კონცენტრირება კონკრეტულ ადგილას ხდება. ტროპიკული მცენარეების დარგვის იდეა გუნდს ძალიან სიმბოლურად ეჩვენება, რადგან მათი ერთიანობით ჯუნგლები მიიღება, ნიუ-იორკს კი ხშირად ურბანულ ჯუნგლებს უწოდებენ. Ⴑტუდენტებმა თითქოს გადაწყვიტეს ბეტონის ჯუნგლების ალტერნატიული რეალობა, მწვანე ჯუნგლები მიწისქვეშ განეთავსებინათ. ლოულაინის დასრულება 2021 წლისთვის იგეგმება, მანამდე კი ლაბორატორია შემოწირულობებით საზრდოობს. უკვე შემდგარი კონცეფციის სანახავადაც თუნდაც მინიმალური თანხის დონაციაა საჭირო.