ითვლება, რომ ფერებს აქვთ თავისი ენერგია, რომლითაც ისინი მოქმედებენ ადამიანზე. თქვენ შეიძლება ყოველდღიურ ცხოვრებაში გაუცნობიერებლად იყენებდეთ რომელიმე ფერს, გუნება განწყობის ასამაღლებლად, დასამშვიდებლად და ა.შ. შეიძლება შეგიმჩნევიათ კიდეც, თუ როგორ მოქმედებს განსხვავებული ფერები თქვენს ხასიათზეც. სწორედ ამიტომაა მნიშვნელოვანი კარგად ვიცოდეთ რა დატვირთვა აქვს თითოეულ ფერს და როგორ გამოვიყენოთ ისინი ჩვენ სასიკეთოდ. მათ, ვინც დაკავებულია ფერების თერაპიით სჯერათ, რომ ფერები გავლენას ახდენენ ადამიანის შინაგან ორგანოებზეც. ასე მაგალითად, წითელი მოქმედებს თირკმელებზე, იასამნისფერი ტვინსა და ნერვიულ სისტემაზე, ლურჯი- თვალებზე, ცისფერი-ფარისებრ ჯირკვალზე და ასე შემდეგ. სწორედ ამიტომ სამკურნალო აბაზანების დროს ხშირად იყენებენ სხვადასხვა ფერის განათებას, ან ფერად კრისტალებს.

ფერების გამოყენება აქტიურადაა დანერგილი ფენგ შუის სწავლებაშიც. აქ თითოეულ ფერს თავისი დატვირთვა აქვს. დიზაინერებსა და სახლის მეპატრონეებსაც, ინტერიერში ფერების განაწილებისას ჭკვიანური დაფიქრება სჭირდებათ. თუ თქვენ გსურთ, რომ თქვენ სახლში ფერები სწორად იყოს განაწილებული, არ იწვევდნენ თქვენს გადაღლასა და გაღიზიანებას, მაშინ მნიშვნელოვანია ფერების გავლენისა და დანიშნულების შესახებ მეტი ინფორმაციის მოპოვება. გახსოვდეთ, რომ სახლი ისე უნდა მოაწყოთ, რომ მაქსიმალურად შესძლოთ განტვირთვა და დასვენება. ცისფერი და ლურჯი ფერები წყალთან ასოცირდება. ისინი ზრდიან სიმშვიდის, გულწრფელობის, ნდობის დონეს და ამავდროულად თავისუფლების ენერგიით ავსებენ ადამიანს. ლურჯი ფერი გვათავისუფლებს უარყოფითი ემოციებისგან და გვაძლევს საშუალება გავერკვეთ ჩვენ სიღრმისეულ გრძნობებში და მოვიპოვოთ შინაგანი სიმშვიდე. სახლში, ამ ფერის გამოყენება საუკეთესო იქნება სამუშაო ან სამეცადინო ოთახში.

ყვითელი ფერი, რომელიც დადებით ენერგიასთან ასოცირდება, ზრდის მხიარულებას, სინათლეს, შინაგან ძალას, კრეატიულობას ადამიანში. ეს ფერი კარგი საშუალებაა რომ დადებითად დამუხტოთ როგორც თქვენი სხეული, ისე გონება. ამ ფერის გამოყენება წარმატებით შეგიძლიათ სამზარეულოსა და მისაღებ ოთახში. რაც შეეხება მწვანეს ის ბალანსთან, სიცოცხლესთან, ზრდასთან და ჰარმონიასთან ასოცირდება. მწვანე ფერი ყველაზე მეტად გვახსენებს ბუნებასთან კავშირს. კარგი იქნება თუ ამ ფერს ბუნებრივი საშუალებებით გამოიყენებთ თქვენს ინტერიერში. დადგით მცენარეები ყველა ოთახში, მათი გავლენა თქვენზე აუცილებლად დადებითი იქნება. თუ ამ ფერის გამოყენება კედლებზე გსურთ გირჩევთ ის საძინებელსა და მისაღებ ოთახში გამოიყენოთ. რაც შეეხებათ ნარინჯისფერსა და წითელს ეს აქტიური ფერები დიდ ენერგიასთან არის კავშირში. ნარინჯისფერი მოქმედებს კრეატიულობასა და პროდუქტიულობაზე, გავსებთ ოპტიმიზმით და ენთუზიაზმით. წითელი კი პირდაპირ მოქმედებს ფიზიკურ ენერგიაზე. ეს არის ცეცხლის, ვნების სიძლიერის ფერი. რა თქმა უნდა თქვენ სახლში ამ ფერების გამოყენებისგან შეზღუდული არ ხართ, თუმცა აუცილებლად უნდა დაიცვათ ბალანსი, წინააღმდეგ შემთხვევაში თქვენი საცხოვრებელი გარემო ზედმეტად დამღლელი იქნება. თუ ამ ფერებით კედლების შეღებვას გადაწყვეტთ ეცადეთ უფრო რბილი ტონები აარჩიოთ, ხოლო კაშკაშა წითელი და ნარინჯისფერი დეკორის სახით გამოიყენოთ.