2018 წლის საძინებელი - ეს ნათელი და ფართო ოთახია, მიუხედავად იმისა, რამდენ კვადრატულ მეტრს ითვლის ეს უკანასკნელი. თანამედროვე ტენდენციების გათვალისწინებით, შეგვიძლია ინტერიერში სიმარტივისა და თავისუფლების ილუზია შევქმნათ. ფერის პალიტრის შერჩევისას ოთახის ზომა და მისი ადგილმდებარეობა გაითვალისწინეთ. მაგალითად, თუ საძინებელი განთავსებულია აღმოსავლეთით, შენობის სამხრეთ-აღმოსავლეთ მხარეს, მზის შუქი საკმარისი იქნება და შესაძლებელია ცივი ფერები გამოიყენოთ. თუკი ოთახი ჩრდილოეთ მხარეს მდებარეობს, მაშინ ფეროვანი ტემპერატურის „გრადუსი აწიეთ“. დიზაინერები გვირჩევენ, რომ სამ ფერზე მეტი არ გამოვიყენოთ. ნათელი ტონის არსებობა აუცილებელია. ამ შემთხვევაში, თეთრი ფერი საძინებლის გასაფორმებლად ყველაზე პოპულარულ ფერად გვევლინება. ის შეიძლება ნებისმიერ ფერს შევუხამოთ ან მისი საშუალებით სივრცე ვიზუალურად გავზარდოთ. თეთრი ფერი სისუფთავესთან და სიმარტივესთან ასოცირდება. ამფერ ფონს, თუ ნაცრისფერ და ხისფერ ტონს კონტრასტულ ელემენტებად დავუმატებთ, საინტერესო, თანამედროვე სტილს მივიღებთ.

ინტერიერში აგურის გამოყენება არც 2018 წლისთვის კარგავს პოპულარობას. საძინებელი ოთახი ჰარმონიულად იღებს ამ ტექსტურირებულ ჩანართს. თუ თვლით, რომ აგურის კედელზე ნატურალური ფერების გამა ზედმეტად თამამი გადაწყვეტილებაა, მაშინ გამომუშავებულ, წყალზე დამზადებულ ღია ფერის აგურებს გირჩევთ. ეს უკანასკნელი არაჩვეულებრივი ფონია ავეჯისა და დეკორისთვის. კედლის გასაფორმებლად, სპეციალისტები გვირჩევენ, გამოვიყენოთ მატერიისა და ფერების ყველანაირი კომბინაცია. ეს დიზაინს უფრო ორიგინალურსა და ექსტრავაგანტულს გახდის. განსაკუთრებული ყურადღება ეთმობა საწოლის ზედა მხარეს. მისი გაფორმება შეგვიძლია: ფოტოპრინტებით, კედლის ფილებით (დამზადებული: ხისგან, აკრილისგან, კერამიკისა თუ მინისგან), თაბაშირით და ქსოვილით. ასევე ტრენდულია იმიტირებული ქვის გამოყენება, რომლის პატარა ნაწილიც კი ჩვენს სახლს მდიდრულ ვიზუალს შემატებს. თუ გადაწყვეტთ კედლის სპეციალური საღებავით მოხატვას, რომელზეც შეგიძლიათ ცარცით ან ფლომასტრით წერა, ეს სტილური, დიზაინერული და ამავდროულად ფუნქციური გადაწყვეტილება იქნება.

2018 წლისთვის, ჭერის გასაფორმებლად გამოიყენეთ შემდეგი მატერიები: კრამიტი, გიპფსოკარდონი, ხის პანელები. ამით თქვენ ერთფეროვნებას გაექცევით. რაც შეეხება იატაკს, დიზაინერები გვირჩევენ ცალფიცრებისა და ნატურალური მატერიების გამოყენებას. ეს ეკოლოგიურად უსაფრთხოცაა და ესთეტიკურად ოთახს ახალისებს. იატაკი ნათელი, ფაქტობრივად, თეთრი უნდა იყოს. ეს ვიზუალურად გაზრდის სივრცეს და ჰარმონიულად შეერწყმება თეთრ საძინებელს.

არავინ დავობს იმაზე, რომ საწოლი საძინებელი ოთახის მთავარი ელემენტია. სპეციალისტების პროგნოზით, 2018 წელს განსაკუთრებულად პოპულარული აბსოლუტურად რბილი საწოლები იქნება. ისინი არა მარტო ფუნქციურ ელემენტად წარმოგვიდგება, არამედ - ინტერიერის მიმზიდველ დეტალადაც. ეგზოტიკის მოყვარული დიზაინერები კი გვირჩევენ, რომ საწოლზე უარი საერთოდ ვთქვათ და ორიგინალური გადაწყვეტილება მივიღოთ და მატრასი პირდაპირ იატაკაზე გავშალოთ.