სარკე თქვენი სახლის მნიშვნელოვანი ნაწილია, რომელსაც ხშირ შემთხვევაში ერთფეროვანი ჩარჩო „ამშვენებს“ და სწორედ ამიტომ ის ხშირად იკარგება სხვა, უფრო შთამბეჭდავი ნივთების გარემოცვაში. თუმცა ჩარჩოს გახალისება ძალიან მარტივად შეგიძლიათ, უბრალო ნივთების გამოყენებით. ღილები, მოზაიკა, ბისერები, ნიჟარები, ქვები, პატარა ტოტები, ფოტოები, მუსიკალური დისკები, შუშის ნამსხვრევები, ბაწრები, სუფრის აქსესუარები და ა.შ. - სარკის ჩარჩოს მოსართავად ნებისმიერი მათგანის გამოყენება შეგიძლიათ.

თუ თქვენ სახლში თეთრი ფერი და მისი სხვადასხვა ტონალობები ჭარბობს უმჯობესი იქნება თუ ჩარჩოს ფერად, გამოკვეთილ ფერებში გადაწყვეტთ. ამის გაკეთება ფერადი, წებოვანი ლენტებით, ან მძივებითაც შეგიძლიათ. ასე ინტერიერს გამოაცოცხლებთ და მშვენიერ დეკორატიულ ელემენტს შემატებთ მას. განსაკუთრებულად ექსტრავაგანტულია სარკე, რომელიც სამზარეულოს ნივთებითაა გაწყობილი. სარკის ჩარჩო შეგიძლიათ ჩანგლებით და კოვზებით მორთოთ და თქვენი სამზარეულო, ან სასადილო ოთახი დაამშვენოთ.

განსაკუთრებით ლამაზი და პომპეზურია ნიჟარებით გაწყობილი სარკე. ასეთი სარკე არამხოლოდ სააბაზანო ოთახს, არამედ სახლის ნებისმიერ კუთხეს დაამშვენებს. თუ თქვენ საზაფხულო მოგზაურობიდან სახსოვრად ნიჟარები წამოიღეთ, შეგიძლიათ მათი ამ კუთხით გამოყენებაც. თუმცა გახსოვდეთ, რომ ისინი საკმაოდ მძიმეა და მათ დასაწებებლად კარგი წებო, ან ორმაგი წებოვანი ლენტის გამოყენება დაგჭირდებათ. გახსოვდეთ, რომ მსგავსი ჩარჩოების შექმნა დროსა და ყურადღებას მოითხოვს. აუცილებელია საქმეს პროფესიონალურად მიუდგეთ, რადგან ამ ნივთმა თქვენი სახლი უნდა დაამშვენოს. თუმცა დამიჯერეთ, თქვენი შრომა ნამდვილად არ დაიკარგება და თქვენს მიერ შექმნილი მშვენიერი სარკე აუცილებლად გააოცებს ნებისმიერ მნახველს.