ბოლო წლების განმავლობაში მინიმალიზმი პოპულარობას არ კარგავდა, თუმცა ამ წელს მას მაქსიმალიზმი ანაცვლებს. რაც უფრო მეტია, მით უკეთესია, ამბობენ დიზაინერები. მაქსიმალიზმის იდეა ტანსაცმლის მოდაშიც აღორძინდა, რასაც არც სახლის ინტერიერის დიზაინი ჩამორჩა. თუ გინდათ ამ ტრენდს მიჰყვეთ, შეიძინეთ მასიური დივანი ან გრძელი ხალიჩა. დიზაინერები თვლიან, რომ ცხოველებით შთაგონებული დეკორაციები სივრცეს გაახალისებს. ეს ტრენდი განსაკუთრებით მისაღებია იმ ადამიანებისთვის, რომლებიც ცხოველებზე გიჟდებიან. ცნობილი დიზაინერი პიტერ დანემი თვლის, რომ 2018 წელს სახლის აქსესუარებს შორის ბევრ ხელით დამზადებულ კერამიკას ვიხილავთ. ტექნოლოგიურად განვითარებულ სამყაროში, ხელნაკეთი ნივთები ნოსტალგიურ განწყობას აღგვიძრავს. პიტერი აღნიშნავს, რომ ისინი უფრო მასიური და სკულპტურული გახდება.

სახის ხელოვნება - ეს კიდევ ერთი გაცოცხლებული ტრენდია, რომელიც 2018 წელს გვხვდება. სახეებს წამყვანი როლი უჭირავთ როგორც ვინტაჟურ, ასევე თანამედროვე ხელოვნებაში. ამ კლასიკური ნიმუშების მიმართ გაცხოველებული ინტერესია. კედელზე ჩამოსაკიდად არაჩვეულებრივი იქნება ისეთი სურათი ან თუნდაც შპალერი, რომელზეც სახე ან სახეებია გამოსახული.

აბაჟურების მიმართ ინტერესი უფრო და უფრო იზრდება. ნაკეცებიანი, მოწნული ან ნაკვთოვანი აბაჟურები ინტერიერს უფრო დახვეწილს გახდის. ეს სიახლის შემომტანიც იქნება. მოღუნული სავარძლები L-ფორმის ავეჯის სასიამოვნო ალტერნატივაა. ამას არქიტექტორი ელიზაბეტ რობერტსი გვეუბნება. მისი თქმით, ამ ფორმის ავეჯი ოთახს ლამაზად გამოყოფს. ასევე ეს დივნები არაჩვეულებრივი დანამატია მართკუთხა ფორმის ოთახებისთვის. თავად ამგვარი ფორმა კი 70-იანი წლების რეინკარნაციაა. ჭურჭელს რაც შეეხება, შეიძინეთ ისეთი, რომელიც ვიზუალურად ლამაზი იქნება. ეს შეიძლება იყოს ჩვეულებრივი ჭიქებიდან დაწყებული ანტიკური თეფშებით დამთავრებული.

სახის ხელოვნებასთან ერთად, გეომეტრიული არტიც დიზაინერების ერთ-ერთი საყვარელი და ხშირად გამოყენებადი ტრენდია. მთავარია ერთი წესი გაითვალისწინოთ: გეომეტრიული ფიგურები ნათელი და ღია ფერებით უნდა იყოს შექმნილი.

2018 წელი დაწნული აქსესუარების წელია. დაწნული მაგიდები, აბაჟურები თუ განათებები, მითუმეტეს, თუ მათზე ცხოველების პატერნია დატანებული, წლევანდელი მოდის პიკს წარმოადგენს. ყველაზე პოპულარულ და არაორდინალურ ვარიანტად კი პალმის ფოთლებისგან დაწნული ჭაღი გვევლინება.