სიცილის თერაპია ანუ სიცილის იოგა, დღეს ძალიან აქტუალური აქტივობაა, რომელსაც სულ უფრო მეტი ადამიანი მიმართავს, რათა დაძლიოს სტრესი და დაძაბულობა. მეცნიერებმა დაამტკიცეს, რომ სიცილი არამარტო განწყობას გვიუმჯობესებს, არამედ ჩვენს ჯანმრთელობაზეც დადებითად მოქმედებს. სიცილი ხსნის დაძაბულობას, ადუნებს თქვენს სხეულს, აძლიერებს იმუნურ სისტემას, სისხლის მიმოქცევას, რაც ხელს უწყობს გულის გამართულად ფუნქციონირებას. ენდორფინები, რომელიც სიცილის დროს ჭარბი რაოდენობით გამოიყოფა, თრგუნავს ტკივილს და აბედნიერებს ადამიანს.

სიცილის თერაპიას აქტიურად იყენებენ ის ადამიანები, რომლებიც დეპრესიით იტანჯებიან, რადგან ითვლება, რომ ეს საუკეთესო საშუალებაა მისგან თავის დასაღწევად. სწორედ სიცილი თრგუნავს სტრესისა და დაძაბულობის შეგრძნებას, მღელვარებას. თუ თქვენ ამჩნევთ, რომ ყველაფერი გაღიზიანებთ, ერთფეროვანი და მომაბეზრებელია თქვენთვის ცხოვრება, ან უბრალოდ ზედმეტად დამღლელი და დაძაბული, აუცილებლად უნდა იცინოთ ბევრი. შეიძლება ეს არასერიოზულად ჟღერდეს, მაგრამ კარგად დაფიქრდით და გაიხსენეთ, როგორი განწყობა და დამოკიდებულება გაქვთ ყველაფრის მიმართ, მას შემდეგ რაც გულიანად იცინით? სწორედ სიცილი გავსებთ პოზიტივით და გმუხტავთ დადებითად, რაც თავის მხრივ სხვა ადამიანებსაც იზიდავს თქვენკენ. ყველას უხარია ნათელ და ბედნიერ ადამიანთან ურთიერთობა, რადგან სიცილიც და მისგან გამოწვეული განწყობაც გადამდებია.