ვინტაჟური სტილიც სწორედ ასეთი გამოვლინებაა. მისი მთავარი მიზანია ეკლექტიკით შექმნას ისტორიული ატმოსფერო. ნამდვილად, ვინტაჟური სტილი უფრო ატმოსფეროსა და შეგრძნებების შექმნას ემსახურება, ვიდრე კონკრეტული გარემოსი. ვინტაჟური ინტერიერი თბილი და სტუმართმოყვარეა. განწყობებისა და სენტიმენტების შექმნაში ასეთ გარემოს ძირითადად რესტავრირებული ავეჯი, ტრადიციული მატერია, ძველი დეკორატიული ნივთები, შავ-თეთრი ფოტოები და მოჩუქურთმებული ჩარჩოები ეხმარება. დიახ, ის ყველაფერი, რასაც ბებიათქვენის ბებია ფლობდა ქმნის ძალიან მყუდრო და მიმზიდველ გარემოს. ვინტაჟურ აზროვნებას არ აქვს შეზღუდვა ფერთა გამაში ან მასალის არჩევაში: თუ ასეთ გარემოში ცხოვრება გადაწყვიტეთ, თქვენი მიზანია უბრალოდ ძველი ამბავი მოყვეთ, აჩვენოთ საკუთარი ან გამოგონილი ისტორია, არქიტექტურული ან დეკორატიული შეზღუდვებისგან სრულიად თავისუფალი ბრძანდებით. ეკლექტიკა მთავარი ხერხია თქვენი სურვილების განსახორციელებლად.

საინტერესოა, რომ დღევანდელ რეალობაში საუკეთესო ვინტაჟური ინტერიერის პროექტები ჩვენსავე ქალაქში უნდა ვეძებოთ. თბილისის ვინტაჟური კაფეებისა და შუშაბანდების პოპულარობა ქვეყნის საზღვრებს გასცდა. საინტერესოა, რამ განაპირობა სტილის ასეთი აქტუალობა თბილისში. მიუხედავად იმისა, რომ ტრენდი რამდენიმე წლისაა, უნდა აღინიშნოს, რომ ბუნებრივად ეკლექტურ ქალაქს, რომელიც სიჭრელით და ღია ცხოვრებით ხასიათდება, ვინტაჟი ძალიან უხდება. აივნებისა და შუშაბანდების ქალაქის ისტორიები თითქოს შიგნით შევიდა და ახლა, ინტერიერში ცოცხლდება საუკუნის წინანდელი ამბები. ალბათ, სწორედ ქალაქია ვინტაჟის გაცოცხლების წინაპირობა.

თუ გნებავთ, რომ თქვენი საცხოვრებელი სახლიც თბილისურ კაფეს დაემსგავსოს, იყოს თბილი და რომანტიული, რედეკორირებისთვის ნივთებისა და პრინტების ძიება ძველმანების ბაზრობაზე, ანტიკვარულ მაღაზიებში და ბებიათქვენის სკივრში უნდა დაიწყოთ.