მართალია, სახლის დალაგება თითქმის ყველას გვეზარება, თუმცა ეს პროცესი არც ისეთი საშინელია, როგორც წარმოგვიდგენია. ამ პროცესის გამარტივება შესაძლებელია, თან ისე, რომ არც ძალიან დაიღლებით და არც შაბათი-კვირის გატარება მოგიწევთ ლაგებაში. არსებობს რამდენიმე რჩევა, რომელსაც პროფესიონალი დამლაგებლები გვაძლევენ და რომელსაც სიამოვნებით გაგიზიარებთ. როგორც ამ საქმეში დაოსტატებული ადამიანები ამბობენ, პირველი შეცდომა, რომელსაც სახლის დალაგებისას ვუშვებთ არის, სახლის ნაწილ-ნაწილ დალაგება. ჩვენ ვირჩევთ ერთ ოთახს დასალაგებლად, ამან კი შეიძლება ნახევარი დღე დაგვაკარგვინოს. სჯობს ყველა ოთახი ერთდროულად დალაგდეს, ასე მეტ დროს დაზოგავთ.

პირველ რიგში, აიღეთ რაიმე კალათა და ყველა ოთახს შემოუარეთ. ტანსაცმელი და სხვადასხვა ნივთები, რომლებიც უადგილოდაა მიმოფანტული ამ კალათაში მოათავსეთ. ასე თვალი დაისვენებს და უფრო ადვილად აღიქვამთ გარემოს. დაიწყეთ დასუფთავება მტვრის გადმოწმენდით. დაჰყევით ოთახს მარცხნიდან მარჯვნივ. არ დაგავიწყდეთ კედლების გაწმენდა, კედლებში ჭუჭყი ადვილად იბუდებს და მათი გასუფთავება აუცილებელია. როდესაც ერთ ოთახს მოათავებთ, გადაინაცვლეთ შემდეგ ოთახში და იგივე პროცედურა გაიმეორეთ. მას შემდეგ რაც მტვერს გამოწმენდთ, ავეჯიც გადმოფერთხეთ, შეცვალეთ ზეწრები და გადასაფარებლები, ბალიშის პირები, გადაწმინდეთ ავეჯის კიდეები. ამის შემდეგ შემდეგ შეგიძლიათ სარკეებს და ფანჯრებს მიხედოთ.

რაც შეეხება სამზარეულოსა და აბაზანას, მათი დალაგებაც ერთდროულად დაიწყეთ. მოასხით საწმენდი ხსნარები ორივე ოთახში, გასარეცხი ჭურჭელი კი ცხელ, ქაფიან წყალში მოათავსეთ. უმჯობესი იქნება თუ ჩვევად იქცევთ ჭურჭლის ყოველდღიურად გარეცხვას, ეს მაქსიმუმ 10-15 წუთს წაგართმევთ, მოგროვილი ჭურჭლის რეცხვა კი საათზე მეტი შეიძლება გაგრძელდეს, რაც თავის მხრივ ძალიან დამღლელია. მხოლოდ ამ ყველაფრის შემდეგ შეგიძლიათ იატაკის მოწმენდა. ეს უნდა იყოს სახლის დალაგების ბოლო ეტაპი. გამოიყენეთ მტვერსასრუტი, შემდეგ კი მოაკრიალეთ იატაკი. დღის ბოლოს, როდესაც გემრიელად დაისვენებთ, შეგიძლიათ იმ კალათას მიუბრუნდეთ და მოგროვილ ნივთებს თავისი ადგილი მიუჩინოთ.