როცა საქმე აფრიკული სტილით დეკორირებას მიადგება, არ იფიქროთ, რომ ოთახი დეკორაციული ნიღბებით, სურათებით, სკამებით, მაგიდებით ან სხვა საგნებით უნდა აავსოთ. რაც უფრო ნაკლები, მით უკეთესი - ეს აფრიკული სტილის მთავარი წესია. მისთვის დამახასიათებელია ბეტონის იატაკი. ეს განპირობებულია იმით, რომ აფრიკული კლიმატი ცხელია, ბეტონის იატაკი კი სიცივეს ინარჩუნებს. თუ ზუსტად ამ ტიპის იატაკის დაგებას დააპირებთ, გირჩევთ, რომ ზევიდან სქელი სიზალის ჭილოფი დააფინოთ. რაც შეეხება კედლებს, აირჩიეთ ნეიტრალური ჩრდილები, როგორებიცაა, კრემისფერი, ყავისფერი ან ჩალისფერი. ასევე შეგიძლიათ ორი, ერთმანეთისგან საპირისპირო კედელი, გამომწვარი თიხის ფერით შეღებოთ. აფრიკული დიზაინის ერთ-ერთი პოპულარული ასპექტი სტრუქტურული საღებავია. ეს არის საღებავი, რომელსაც ზედაპირზე წასმისას, აქვს ქვიშის ტიპის უხეში ტექსტურა. რადგანაც აფრიკული სტილის ფესვები, თავისთავად, აფრიკის ცხელ კონტინენტზე გვხვდება, მისთვის დამახასიათებელი მთავარი ფერები თბილი ფერებია. ძირითადად, თქვენ შემდეგ ფერებს შეხვდებით: ყვითელი, წითელი, ყავისფერი, ღია მოყავისფრო–მოყვითალო ფერი, ფორთოხლისფერი, რძისებრ-თეთრი. როგორც ხედავთ, ცივი ფერები მინიმუმამდე არის დაყვანილი. შესაბამისად, აფრიკული სტილისთვის დამახასიათებელი ფერები ოთახს გაანათებენ, განსაკუთრებით ცივ და უმზეო დღეებში.

სახლისთვის განკუთვნილი საგნები, აფრიკაში, ბუნებრივი მატერიებისგან არის დამზადებული. ესენია: ჩალა, ხე, თიხა და ფოთლები. თუ თქვენი სახლისთვის მსგავსი სტილის დეკორირებას გადაწყვეტთ, აუცილებლად ბუნებრივი მატერიებისგან დამზადებული ნივთები გამოიყენეთ. მაგალითად, აირჩიეთ ნაქსოვი ფარდები ფანჯრებისთვის და ხის ჩარჩოები სურათებისთვის. აფრიკული დიზაინის სქემისთვის ხე აუცილებელი კომპონენტია. ინტერიერში აუცილებლად გასათვალისწინებელია ეთნიკური დიზაინები. ზებრას პატერნი მათ შორის ყველაზე პოპულარულია. თუმცა, არ გეგონოთ, რომ თქვენს სახლში აფრიკული სტილის დასანერგად, მხოლოდ ზებრას ზოლებიანი ხალიჩის დაგებაა საკმარისი. კარგი იქნება თუ ამ სტილს, სხვა დიზაინის სტილს შეუხამებთ. მაგალითად, შეგიძლიათ ტროპიკული სტილი მოიშველიოთ. ასე თქვენი საცხოვრებელი გარემო უფრო ეგზოტიკურ ელფერს შეიძენს.