აქტიურად დასვენება დადებითად მოქმედებს თქვენს ჯანმრთელობაზე. ლაშქრობები, სათავგადასავლო სპორტი, ველოსიპედით მოგზაურობა, კლდეზე ცოცვა, ჯომარდობა და სხვა აქტივობები აუცილებლად გაგაჯანსაღებთ ფიზიკურად. სუფთა ჰაერზე, ჟანგბადით სავსე გარემოში ყოფნა აჯანსაღებს თქვენს სხეულს და ის ნაკლები დატვირთვით ფუნქციონირებს. რეგულირდება სისხლის წნევა და ძლიერდება იმუნური სისტემა. როდესაც ახალ-ახალი ადგილების სანახავად ზურგჩანთით მოკიდებული გადაადგილდებით, სეირნობთ ტყეში ან იპყრობთ მთებს, თქვენ განიცდით ფიზიკურ დატვირთვას და წვავთ უამრავ კალორიას. თქვენი კუნთები აქტიურდება და ეჩვევა მოძრაობას. თუ თქვენ მთელი კვირა სამსახურში ჯდომა გიწევთ და ფიზიკურად ნაკლებად აქტიური ბრძანდებით მაშინ, დამერწმუნეთ აქტიური დასვენება სწორედ ისაა, რაც აუცილებლად გჭირდებათ. აქტიური დასვენების მოყვარულები ფიზიკურ ჯანმრთელობასთან ერთად, მენტალური სიჯანსაღითაც გამოირჩევიან. რადგან ეს ყველაფერი პირდაპირაა დაკავშირებული სტრესის კლებასა და თქვენი ხასიათის გაუმჯობესებასთან. თქვენ ეცნობით ახალ ადგილებს და ხვდებით სხვადასხვა ადამიანებს. თავგადასავლებით სავსე დასვენების ერთ-ერთი უპირატესობა დაუვიწყარი მოგონებებია, რომელსაც ყოველთვის პოზიტიურად გაიხსენებთ.

თავგადასავლებით სავსე, აქტიური დასვენების დროს თქვენ სწავლობთ სირთულეებთან განმკლავებასაც. ადვილად ახდენთ ცვლილებებზე რეაგირებას და ხდებით უფრო თავდაჯერებულნი. ნუ შეგეშინდებათ თავგადასავლებისა და სიახლეების. ხანდახან ყველას გვჭირდება ადრენალინი და მძაფრი შეგრძნებები, ამ დროს ხომ თითქოს ახლიდან იბადები და თავს უბედნიერესად გრძნობთ. დაგეგმეთ სათავგადასავლო ტურები თქვენს მეგობრებთან და ახლობლებთან ერთად, მოინახულეთ ულამაზესი ადგილები და ჩაერთეთ სხვადასხვა სპორტულ აქტივობებში. ეს თქვენს თავდაჯერებულობას აამაღლებს, გაამაგრებს თქვენს სოციალურ კავშირებს, მოგცემთ საშუალებას განიტვირთოთ, დაისვენოთ და ისიამოვნოთ.