თუ თქვენ კულინარია გიტაცებთ, აუცილებელია გქონდეთ ქორფა, ნიტრატების გარეშე მოყვანილი მწვანილები და სხვადასხვა მცენარეები, რომლებიც თქვენს კერძებს განსაკუთრებულ გემოს შესძენს. თავშავა, ბაზილიკი, ქინძი, რეჰანი, ოხრახუში, პიტნა, ლავანდა და სხვ. მცენარეები, არამარტო სასარგებლო და გამოსადეგი, არამედ ლამაზი ბალახებია, რომელიც თქვენი სამზარეულოს ინტერიერს აუცილებლად გაამრავალფეროვნებს. აუცილებელია სწორად შეარჩიოთ ადგილი, სადაც სხვადასხვა ბალახეულს გაახარებთ. უკეთესია თუ სამზარეულოში, მზიან, ფანჯარასთან ახლოს მდებარე სივრცეს შეარჩევთ. მნიშვნელოვანია, რომ ამ მცენარეებმა მინიმუმ 4 საათი მაინც მიიღონ მზის სხივები. გახსოვდეთ, რომ სამხრეთ და სამხრეთ-დასავლეთით მდებარე ფანჯრებიდან ყველაზე დიდხანს შემოდის სინათლე. ჩრდილოეთით მდებარე ფანჯრებიდან კი ყველაზე ნაკლებად.

არ იფიქროთ, რომ თქვენი „სახლის ბაღის“ გაშენებას რაიმე განსაკუთრებული ტემპერატურა ჭირდება. ასეთი მცენარეები, თავს ძალიან კარგად გრძნობენ ჩვეულებრივ სახლის ტემპერატურაზე (18-21 გრადუსი). არც იმაზე ინაღვლოთ თუ ღამე ტემპერატურა ვარდება, თქვენი მცენარეებს ეს მოსწონთ და ამაში საშიში არაფერია. რაც შეეხება მათ გასახარებელ ჭურჭელს, ნუ შემოიფარგლებით ჩვეულებრივი ქოთნებით. გახსოვდეთ, რომ თქვენი პატარა ბაღი, თქვენივე სახლში მდებარეობს და ამიტომ, ის სახლის ინტერიერს უნდა უხდებოდეს. მათ ჩასარგავად შეგიძლიათ გამოიყენოთ სხვადასხვა ვინტაჟური ნივთები, ან შუშის ქილები და თიხის ჭიქები. შეგიძლიათ მცენარეები კედელზე მოათავსოთ ან ჭერზე ჩამოკიდოთ. არჩევანი თქვენზეა!