ნოხი

ფილმ The Big Lebowski-ს მოყვარულებს, სავარაუდოდ, კარგად გახსოვთ განაწყენებული ჯეფ ლებოვსკის ფრაზა, ნოხს რომ მოპარავენ: „It really tied the room together“, (ის მართლაც კრავდა ოთახს) — ეუბნება მეგობარს. ეს, რაღათქმაუნდა, ხუმრობით, თუმცა დაგვეთანხმებით, რომ ოთახის ინტერიერში ნოხს მართლაც გადამწყვეტი სიტყვის თქმა შეუძლია. იმისათვის, რომ თქვენს საცხოვრებელში კონცეპტუალური გარემო შექმნათ, ფერადოვანი და შავ-თეთრი პრინტებით გაფორმებული ელემენტების შერევას გირჩევთ. რაც შეეხება ავეჯს, არჩევანი გეომეტრიული ფორმებით კონსტრუირებულ, მინიმალისტურ მაგიდაზე შეაჩერეთ.

აქცენტირებული დეტალები

გადასაფარებლის და ბალიშების შეხამება ოთახს დასრულებულ ელფერს შესძენს. გახსოვდეთ, რომ სისადავის და სიჭრელის ბალანსი მკაცრად უნდა დაიცვათ, ინტერიერი რომ არ გადაიტვირთოს: ხავერდის ფაქტურის პუფთან ერთად ოთახში ნეიტრალური — შავი ან რუხი ფერის გადასაფარებლების გამოყენებას გირჩევთ, რომლებსაც ფერადი ბალიშები იდეალურად მიესადაგება. სიმყუდროვის ასოციაციის გასაძლიერებლად იქვე ხის მასიური სანათი განათავსეთ.