ინტერიერის დეკორატორები გვასწავლიან, როგორ უნდა მოვახდინოთ წარუშლელი შთაბეჭდილება ვიზიტორზე რამდენიმე მარტივი ხერხით. კონცეპტუალური დიზაინის ინტერიერი ავეჯის და სხვა ნივთების ფერების და ფაქტურების ნაზავით იქმნება. სწორი შეხამებით და ბუნების ელემენტებთან შერწყმით ტენდენციური პრინტები სახლის გაფორმების უამრავ იდეას შთაგაგონებთ. პირველ რიგში, უნდა გააცნობიეროთ, რომ სიმბოლიზმი და რიტმი თქვენს სახლს უფრო მეტ მისტიკას და საკრალურ იერს შესძენს და ყველაფერს თვალისთვის უხილავ წესრიგში მოიყვანს. სწორედ ამ მოსაზრებას მიყვება ახალი ტრენდი, რომლის მიხედვითაც დეკორი თუ ხელოვნების ნიმუში, ინტერიერში რიცხობრივ რიტმს უნდა მიყვებოდეს. ყველაზე მარტივი მაგალითი ამისა არის სურათის, ფერწერული ტილოსა თუ დიდი ფოტოგრაფიის პანელებად დაყოფა, და კედლის ზედაპირზე განთავსება. ბალიშების შესაბამისად გადანაწილება და ასე შემდეგ. აღსანიშნავია, რომ დეკორატორი აიზენი ამბობს, პანელი 3 ცალი უნდა იყოს და საერთოდ, დეკორაციაში ტრიო ძალიან ეფექტურია.

სივრცის კომპოზიციურად შეკვრაში დაგეხმარებათ ერთგვარი შემკრები წერტილი, ფოკუსი, რომელიც ძირითადად დეკორაციაა და ფერით, ფორმით ან ზომით განსხვავდება სხვა საგნებისგან. სწორედ ეს ხდება ერთგვარი შემკრები წერტილი, საიდანაც თვალი სივრცის აღქმას იწყებს, რის შესაბამისადაც შეგიძლიათ განალაგოთ ავეჯი, ნივთები და თუნდაც ფუნქციური ზონები. გარდა ამისა, ეცადეთ ოთახი მაქსიმალურად განტვირთოთ პატარა გამოუყენებელი ნივთებისგან, რადგან როგორც აღმოჩნდა, მინიმალიზმი ყველაზე დიდ შთაბეჭდილებას ახდენს და მშვიდ განწყობას იწვევს ადამიანებში.

დეკორირებით ბევრად უფრო მარტივია მიხვდე ზუსტად რა გჭირდება სივრცეში, ხშირად ცვალო საცხოვრებლის იერი და რაც მთავარია, შეცვალო ყოველდღიურობა იაფად, მაგრამ საფუძვლიანად. არქიტექტურის მასშტაბურობა, ხომ სწორედ დეტალებშია. მთავარია ამოარჩიოთ ის სიმბოლური ნივთები, რომლებიც თქვენი ცხოვრების სტილს ან რომელიმე მოგონებას გამოხატავენ. ასე უფრო დაათბობთ საცხოვრებელ გარემოს და მყუდრო ხასიათს შეიტანთ მასში.