ლუვრი აბუ დაბიში, რომლის გახსნასაც ძალიან დიდხანს ელოდნენ, ამ შემოდგომას თავის პირველ მნახველებს უმასპინძლებს. მუზეუმი ფრანგი არქიტექტორის, პრიცკერის პრემიის ლაურიატის, ჟან ნოველის მიერაა დაპროექტებული და როგორც კრიტიკოსები ირწმუნებიან, ის ნამდვილად ღირდა ლოდინად. თანამედროვე ლუვრი საადიატის კულტურულ რაიონში მდებარეობს. მასში დაცული იქნება 600 ხელოვნების ნიმუში, ისტორიულ-კულტურული დანიშნულების ხელნაწერები და ობიექტები. ასევე აქ შეგიძლიათ იხილოთ 300-ზე მეტი შედევრი საფრანგეთის ინსტიტუტებიდან. მუზეუმს ამშვენებს გამორჩეულად დაპროექტებული გისოსიანი გუმბათი, რომელიც შენობას მზის სხივებით გაანათებს და ამავდროულად გადახურებისგანაც დაიცავს. სწორედ ადგილობრივი კლიმატი გახდა მთავარი მიზეზი მსგავსი კრეატიული გუმბათის დაპროექტებისას, რომელიც არაჩვეულებრივად ერწყმის ადგილობრივ გარემოს, იყენებს მზის სინათლეს და ბუნებრივ თანხვედრაში აქცევს ჩრდილებისა და სინათლის თამაშს, რითაც შენობას განსაკუთრებულად მიმზიდველს ხდის ნებისმიერი მნახველისთვის.

კაპიტოლიუმისა და ნაციონალური სავაჭრო ცენტრისგან რამდენიმე კვარტლის მოშორებით იხსნება ბიბლიის მუზეუმი რომლის დიზაინიც SmithGroupJJR -ს ეკუთვნის. აღნიშნული მუზეუმი კერძოა და მისი დამფუძნებელია სტივ გრინი, რომელმაც მუზეუმს პირადი კოლექციიდან 40,000 არტეფაქტი გადასცა. შენობა არ არის უბრალო, მხოლოდ ბიბლიური სიმბოლიკით დატვირთული, ეს არქიტექტურული ნამუშევარი უსწრებს დროს და ამავდროულად რჩება აქტუალური. ადგილთან მიმართებაში ის არის ერთდროულად უნივერსალური და კონკრეტული. ის კარგად ასახავს იმ ძალისხმევას, ინტერპრეტაციებსა და გამოცდილებას, რომელიც მისმა შემქმნელებმა მუზეუმის აშენებისას ჩადეს. ბიბლიის მუზეუმში არამხოლოდ ძველი არტეფაქტების და ბიბლიების კოლექციის ნახვაა შესაძლებელი. ის ასევე მოიცავს ბიბლიურ ბაღს, რომლის დათვალიერებისას შეგიძლიათ იხილოთ თუ როგორ გამოიყურებოდა ჰისოპის ბუჩქი ან შარონის ვარდი. აქვეა კაფეებიც, სადაც მნახველებს უძველესი კერძების დაგემოვნება შეუძლიათ.

ამ ნოემბერშივე გაიხსნება თანამედროვე ხელოვნების მუზეუმი ინდონეზიაში, ჯაკარტაში, რომელიც ქვეყანაში პირველი მოდერნისტული მუზეუმი იქნება. მუზეუმის გახსნა ჯაკარტას ბიენალეს ემთხვევა. 40,000 კვადრატულ მეტრზე განთავსებული შენობა, რომლის დიზაინიც MET Studio-ს მიერაა დაპროექტებული, უმასპინძლებს როგორც ინდონეზიელ, ისე საერთაშორისო ხელოვანებსა და მხატვრებს. ისეთებს როგორებიც არიან: ჯეფ კუნსი, გერხარდ რიხტერი, აი ვეივეი და სხვ