როგორც უამრავმა კვლევამ აჩვენა, რაც უფრო ადრეული ასაკიდან იწყებს ადამიანი კითხვას, მით უფრო მალე ვითარდება ის და ადვილად აღწევს აკადემიურ წარმატებას. ამიტომ, თუ თქვენ ბავშვები გყავთ, გირჩევთ აუცილებლად მოაწყოთ ბიბლიოთეკა საცხოვრებელ გარემოში. ეს ნამდვილად დაეხმარება თქვენს პატარას წიგნების მიმართ ინტერესის გაღვივებაში. არ დატოვოთ არცერთი ადგილი, გამოიყენეთ ცარიელი კედლები, კუთხეები, წიგნების თაროების მოსათავსებლად. თქვენი შვილის ოთახში, აუცილებლად გააკეთეთ მისი საყვარელი წიგნების მინი ბიბლიოთეკა და არ დაგავიწყდეთ მისი განახლება, განსაკუთრებით იმ თემატიკის წიგნებით, რომლის მიმართაც ის ინტერესს იჩენს. კვლევებით დადასტურებულია, რომ რაც უფრო ბევრი წიგნია სახლში, მით უფრო მარტივად ინტერესდება ბავშვი მათი წაკითხვით და უყვარდება ეს საქმე. თუმცა წიგნების მომარაგებასთან ერთად, აუცილებელია საცხოვრებელ გარემოში, მყუდრო ადგილის მოწყობა, სადაც ოჯახის ყველა წევრი თავისუფლად შეძლებს კითხვას.

არ უნდა დაგვავიწყდეს, რომ არსებობს ბიბლიოთეკის მოწყობის წესები, რომლებიც აუცილებლად უნდა გავითვალისწინოთ განსაკუთრებით მაშინ, თუ ამ საკითხს სერიოზულად ვუდგებით. რა თქმა უნდა წიგნის თაროების გაკეთება, სულ უფრო ტრენდული ხდება მისაღებ ოთახში, რადგან ამ ყველაფერს დეკორატიული დატვირთვაც აქვს. თქვენ შეგიძლიათ ძველ წიგნებს, თქვენთვის სასურველი ფერის გარეკანი გაუკეთოთ და ბიბლიოთეკა ვიზუალურად უფრო ლამაზი გახადოთ. ვიზუალურად ასევე მომგებიანია, სქელი და გრძელი წიგნების ქვევით, ჰორიზონტალურად მოთავსება, ხოლო პატარა წიგნების მათ ზევით განალაგება. თაროების გაკეთებისას, აუცილებლად უნდა გაითვალისწინოთ ის, რომ რაც უფრო გრძელია თარო, მით უფრო სქელი უნდა იყოს ის. არ დაგავიწყდეთ განათებაც, ეს ძალიან მნიშვნელოვანი ასპექტია. სინათლე, საკითხავ ადგილას ოდნავ უფრო მეტი უნდა იყოს, ვიდრე დანარჩენ ოთახებში. თუ თქვენ მთელი ოთახი გაქვთ იმისთვის, რომ სახლის ბიბლიოთეკა მოაწყოთ, გაითვალისწინეთ, რომ წიგნებისთვის ზედმეტი სინათლე არ არის კარგი, ამიტომ ფანჯრებს აუცილებლად ჩამოაფარეთ სქელი ფარდები. არც თბილ ოთახია კარგი წიგნებისთვის. ტემპერატურა თქვენს ბიბლიოთეკაში 16 -დან 21 გრადუსამდე უნდა იყოს. წინააღმდეგ შემთხვევაში შეიძლება თქვენ წიგნებს ჭიები ან სოკო გაუჩნდეს. არ დაგავიწყდეთ მტვრის მოწმენდა წიგნებიდან, ეს ჭიებისა და სოკოსგან თავდაცვის ერთ-ერთი საშუალებაა ისევე, როგორც ბიბლიოთეკის განიავება.

და ბოლოს გახსოვდეთ, რომ არ აქვს მნიშვნელობა, რამხელა სახლში ცხოვრობთ. უშველებელი ბიბლიოთეკა გექნებათ თუ პატარა, მთავარია ის, რომ ნებისმიერ სახლში მოიძებნება სულ მცირე ადგილიც კი, სადაც შეძლებთ თქვენი წიგნების განთავსებას და კომფორტულად კითხვას.