დარწმუნებული ვარ, ბავშვობაში ყველა თქვენგანი ხატავდა და ეს თქვენთვის ერთ-ერთი საუკეთესო გართობის საშუალება იყოს. თუმცა წლების მატებასთან ერთად, სამწუხაროდ ვივიწყებთ იმ აქტივობას, რომელიც ასე გვიფერადებდა ბავშვობას. გვეგონა, რომ ხატვასთან არაფერი გვქონდა საერთო ან ჩვენ ის საერთოდ არ გამოგვდიოდა. თუ ასე ფიქრობთ, ნამდვილად ცდებით. ხატვა, პირველ რიგში საკუთარი თავის, თქვენი გრძნობების, ფიქრების, განცდების გამოხატვის საუკეთესო საშუალებაა და ეს მოზრდილებს ისევე გვჭირდება, როგორც ბავშვებს.

როდესაც ჩვენ ვხატავთ, ვწყდებით გარე სამყაროს და მთლიანად ვართ ფოკუსირებულნი ჩვენ ნახატზე. შემოქმედებითი პროცესი ზოგჯერ იმდენად გვითრევს, რომ სხვა არაფერი არ გვახსოვს და ეს არც ისე ცუდია, თუ გავითვალისწინებთ, რომ მუდმივად გადაღლილები ვართ სხვადასხვა პრობლემაზე ფიქრით. გახსოვდეთ, რომ ხატვის დროს თქვენ ძალიან მარტივად შეძლებთ დამშვიდებას, როგორც გონებრივი, ისე ფიზიკური სტრესისა და დაძაბულობის მოხსნას. მეცნიერებმა დაამტკიცეს, რომ ხატვისას ვითარდება ტვინის როგორც მარჯვენა, ისე მარცხენა ნახევარსფერო, ასევე კონცენტრაციის და მოტორული უნარები. იწვრთნება თქვენი ხელები და თვალები. პრაქტიკასთან ერთად კი, სულ უფრო მარტივად ახერხებთ თქვენი ფიქრების უშეცდომოდ გადმოცემას.

ხატვა, განსაკუთრებით სასარგებლოა ბავშვებისთვის. ის ხელს უწყობს მათი ცენტრალური ნერვული სისტემის, სენსორული და მოტორული უნარების განვითარებას. ასევე ანვითარებს მეხსიერების, აზროვნების და მეტყველების უნარებს. ასე, რომ თუ ბავშვები გყავთ არასდროს დაუშალოთ მათ ხატვა, ეცადეთ ბავშვი ამ საქმით ხშირად დაკავდეს. ეს ბევრად უფრო სასარგებლოა ვიდრე კომპიუტერთან ან ტელევიზორთან გაუთავებელი ჯდომა. მეტიც, არ მოგერიდოთ მათთან ერთად ხატვის. შეგიძლიათ სახლში თქვენი სახატავი კუთხე მოაწყოთ. ასე, ეს პროცესი უფრო სასიამოვნო იქნება თქვენთვის და ბავშვისთვისაც, რადგან შეძლებთ მეტი დრო გაატაროთ ერთმანეთთან და ამავდროულად სასიამოვნო საქმე აკეთოთ. ხატვა კი დადებითად აისახება, როგორც ბავშვზე, ისე თქვენზე და ის აუცილებლად შეგძენთ თავდაჯერებულობის გრძნობას და დაგანახებთ საკუთარ უნიკალურობას.

გახსოვდეთ, რომ არ აქვს მნიშვნელობა როგორ ხატავთ, შეგიძლიათ თუ არა სწორი ხაზის გავლება ან ყვავილის დახატვა. არც თქვენ ასაკს აქვს მნიშვნელობა, ხატვისთვის გვიანი არასდროსაა, მთავარია მაქსიმალურად ეცადოთ და გამოხატოთ საკუთარი თავი, თქვენი გრძნობები, ხასიათი, პიროვნება და როდესაც თქვენ ნახატს დაასრულებთ, ძალიან დიდი სიამოვნებას იგრძნობთ და აუცილებლად მოგინდებათ კიდევ ერთი ნახატის შექმნა...