ზოგიერთ ჩვენგანს, რედეკორირებისა თუ რემონტის დროს თავში უამრავი ახალი იდეა ებადება, რომლის განხორციელებაც უცებ სასიცოცხლო მნიშვნელობას იძენს. თუ ძალიან გიყვართ გარემოს მუდმივი ცვლილება და თითქმის არასოდეს ხართ კმაყოფილი მიღწეული შედეგით, უკვე ბევრჯერ შეცვალეთ კედლის ფერი, მაგრამ თავში მაინც ოთახების გადატიხვრის და ღიობების ამოშენების ჯერ კიდევ განუხორციელებელი პროექტები გიტრიალებთ, დროა რედეკორირება ისწავლოთ. 

ინტერიერის დეკორატორები გვასწავლიან, როგორ უნდა მოვახდინოთ წარუშლელი შთაბეჭდილება ვიზიტორზე რამდენიმე მარტივი ხერხით. პირველ რიგში, უნდა გააცნობიეროთ, რომ სიმბოლიზმი და რიტმი თქვენს სახლს უფრო მეტ მისტიკას და საკრალურ იერს შესძენს და ყველაფერს თვალისთვის უხილავ წესრიგში მოიყვანს. თანამედროვე ადამიანის საცხოვრებელი ზოგადად სივრცის გამოთავისუფლებისა და ქაოსის შემცირებისკენაა მიმართული, ამიტომ უხვი დეკორი და აქსესუარებით გადატვირთული ინტერიერი ტრენდული დიდი ხანია აღარ არის. ასე რომ, უნდა აარჩიოთ მხოლოდ ის ნივთები, რომლებიც სივრცეს ტყუილად არ გადატვირთავს და ყალბი დატვირთვა არ ექნება ინტერიერში. 

ამოარჩიეთ ის სიმბოლური ნივთები, რომლებიც თქვენი ცხოვრების სტილს ან რომელიმე მოგონებას გამოხატავენ. ასე უფრო დაათბობთ საცხოვრებელ გარემოს და მყუდრო ხასიათს შექმნით მასში. მიუხედავად იმისა, რომ დეკორში თქვენი ისტორია უნდა იგრძნობოდეს, ნამდვილად ვულგარული გამოვა ყველა ფოტოსა და ნიუანსის ინტერიერში შემოტანა. დიზაინერები გვირჩევენ, რომ ავირჩიოთ სტილის შესაბამისი, მხატვრული ნიმუში ან ტილო და მთელი აქცენტი მასზე გადავიტანოთ. სწორედ ამ მოსაზრებას მიყვება ახალი ტრენდი, რომლის მიხედვითაც დეკორი თუ ხელოვნების ნიმუში, ინტერიერში რიცხობრივ რიტმს უნდა მიყვებოდეს. ყველაზე მარტივი მაგალითი ამისა არის სურათის, ფერწერული ტილოსა, თუ დიდი ფოტოგრაფიის პანელებად დაყოფა და კედლის ზედაპირზე განთავსება. ბალიშების შესაბამისად გადანაწილება და ა.შ. დეკორაციაში ტრიო ძალიან ეფექტურია. 

გახსოვდეთ, დეკორირებით ბევრად უფრო მარტივია მიხვდე ზუსტად რა გჭირდება სივრცეში, ხშირად ცვალო საცხოვრებლის იერი და რაც მთავარია შეცვალო ყოველდღიურობა იაფად, მაგრამ საფუძვლიანად. არქიტექტურის მასშტაბურობა სწორედ დეტალებშია.