დისნეილენდის განუყოფელი ნაწილი აშშ-ის მთავარი ქუჩაა. ის დისნეილენდთან ერთად 1955 წელს გაიხსნა. „აშშ-ის მთავარი ქუჩა“ ამერიკაში ეპოქის გზაჯვარედინია. „გაზის ნათურები და ელექტრონათურები, ცხენები და ავტომანქანები, მთავარი ქუჩა ამერიკის გულია - ყველას სახლი“, - ამბობდა უოლტ დისნეი. ქუჩის დეკორი მე-20 საუკუნის ამერიკის პატარა ქალაქს მოგაგონებთ. ამ ყველაფრის ინსპირაცია კი, უოლტ დისნეის ბავშვობა და ფილმი „ლედი და მაწანწალაა“. ეს ქუჩა ამერიკულ ვიქტორიანულ პერიოდს გაგახსენებთ. აქ განთავსებულია რკინიგზის სადგური, მთავარი მოედანი, კინო-თეატრი, მერია, სახანძრო, რომელიც აღჭურვილია ორთქლის ძრავებით, ბაზარი, მაღაზიები, ორსართულიანი ავტობუსები, ძველი მანქანები, ცხენის ეტლები და ბევრი სხვა რამ, რაც აუცილებლად წარსულში დაგაბრუნებთ. ქუჩის დიზაინი იყენებს საოცარ პერსპექტივებს, რომელიც სიმაღლის ილუზიას ქმნის. პირველი სართულისთვის შენობა ¾ მასშტაბით ააშენეს, მეორე სართულისთვის - 5/8-ით, მესამისთვის - 1/2 -ით. ყოველ სართულთან ერთად მასშტაბი 1/8-ით მცირდე

ამ ქუჩის ყველაზე მთავარი შენობა კი მძინარე მზეთუნახავის ციხე-სიმაგრეა. მის შექმნაში მონაწილეობას იღებდა მარვინ დევისი - 20th Century Fox-ის მფლობელი. მან შეისწავლა საფრანგეთის, ესპანეთის და სხვა ქვეყნების ცნობილი ციხე-სიმაგრეები, საბოლოოდ კი მისი ინსპირაცია გერმანული ნოიშვანშტაინის სასახლე გახდა. ილუსტრატორმა ჰერბერტ დიკენს რაიმანმა (რომელმაც დისნეილენდის პარკის პირველი დიზაინი შექმნა) გადაწყვიტა ისეთი სასახლე გაეკეთებინა, რომელიც პატარა და მეგობრული იქნებოდა. არქიტექტურული ტექნიკის დახმარებით ციხე-სიმაგრე უფრო დიდი ჩანს, ვიდრე რეალურად არის. ეს გამოწვეულია იმით, რომ ქვედა კარები და ფანჯრები დიდი ზომისაა, თუმცა სიმაღლესთან ერთად ისინი ნელ-ნელა მცირდება.

ერთ-ერთი ყველაზე პოპულარული მიწა დისნეილენდში „თუმოროულენდია“. 1955 წლის ინაუგურაციისას, უოლტ დისნეიმ ის შემდეგი სიტყვებით გახსნა: „ხვალინდელი დღე შეიძლება არაჩვეულებრივი ხანა იყოს. ჩვენი მეცნიერები კოსმოსის ეპოქის ფანჯრებს ხსნიან. ეს ყველაფერი კი ჩვენს თაობას წაადგება. თუმოროულენდის ატრაქციონები გაძლევთ იმის საშუალებას, რომ მომავლის გეგმებში მონაწილეობა მიიღოთ“. „თუმოროულენდის“ ორიგინალური დიზაინის ტექნიკურ მხარეზე მეცნიერებმა ვერნერ ვონ ბრაუნმა, ვილი ლეიმ და ჰეინზ ჰაბერმა იზრუნეს. სივრცე ძირეულად შეიცვალა 1967 წელსა და 1998 წელს. მისი მთავარი თემა მომავლის რეტროა, რომელიც ჟიულ ვერნის ილუსტრაციებითაა გაფორმებული.

დისნეილენდი საერთო ჯამში 8 მიწას შეიცავს. თითოეული მათგანი თემატური პარკია, რომელიც ტურისტების ყურადღებას იპყრობს. გახსნის დღიდან, ამ არაჩვეულებრივ ადგილს 650 მილიონზე მეტი ადამიანი სტუმრობდა.