„ელეგანტური ატმოსფეროს“ შექმნას კი ასეთი სტილის ინტერიერის დიზაინში კარგად განაწილებული დეკორი, პასტელური ფერები და განსაკუთრებული ავეჯი ახერხებს. ფრანგული ტრადიციული საცხოვრებელი სახლი იმ ადამიანებისთვისაა, ვისაც ცარიელი სივრცე არ მოსწონს, თუმცა კანონზომიერება მისთვის აუცილებელია. ფრანგული წესით დეკორი ყოველთვის პოულობს გარკვეულ რიტმს ან შემკრებ წერტილს, რომელიც განსაზღვრავს მთლიანი სივრცის ხასიათს. ზოგადად ამ სტილის ინტერიერი, თითქოს ცდილობს პოპმეზური, მაგრამ უბრალო, მყუდრო საცხოვრებელი შექმნას ადამიანისთვის, რომლისთვისაც სტილი ცხოვრების განუყოფელი ნაწილია. სწორედ ეს იდეა განაპირობებს გარკვეულ ზონებს ასეთ სივრცეებში: ერთი ოთახის ორი ნაწილი შესაძლოა ხასიათით მკვეთრად განსხვავდებოდეს ერთმანეთისგან. ამიტომ, ფრანგული ინტერიერი დანაწევრებულია „შთაბეჭდილების მომხდენ“, გრანდიოზულ კუთხედ და ოთახის იმ ნაწილად, სადაც ადამიანური ყოველდღიურობის უბრალოება იგრძნობა.

თუ გსურთ, რომ ინტერიერს ფრანგული, უდარდელი ელეგანტურობის ელფერი შესძინოთ, პირველ რიგში ავეჯს უნდა მიაქციოთ ყურადღება. ის კომფორტული, ნათელი და ტრადიციული უნდა იყოს. ავეჯი მომრგვალებული ფორმებით, ნათელი და რბილი ზედაპირით საუკეთესო არჩევანია. გარდა ამისა, მყუდრო ატმოსფეროს შესაქმნელად, ეცადეთ ბუნებრივი ზედაპირების ერთგვარი „თამაში“ ააწყოთ. ნათელი ხის ზედაპირი ავეჯზე დაუპირისპირეთ მეტალს ან რკინით მოჩუქურთმებულ დეკორს, რომელიც ფრანგული ტრადიციული ინტერიერისთვის ძალიან დამახასიათებელია. წარმატებით შეგიძლიათ გამოიყენოთ აგურის, ხისა და მეტალის აქცენტები სხვადასხვა სათავსებში.

ფრანგული სტილის მოწყობისას ალბათ, მთავარია ეცადოთ რომ საკუთარი სივრცის ნაკლი ადვილად დამალოთ მისი ღირსებების წინ წამოწევით. ნუ მოგერიდებათ პომპეზურობის, ის ხომ ყოველდღიურობის განუყოფელი ნაწილია და რაც მთავარია ენდეთ ინტუიციას.