ჯანსაღი ცხოვრება სწორი კვების გარეშე წარმოუდგენელია. ბევრ ადამიანს სწორ კვებაზე მეტად ცუდი წარმოდგენა აქვს, როგორიცაა სასტიკი დიეტა და უგემური საჭმელების მიღება, თუმცა ეს ყველაფერი ასე არ არის. ჯანსაღი კვება გულისხმობს პროდუქტების მრავალფეროვნებას, ბალანსირებულ რაციონს, გემრიელ და სასარგებლო კერძებს. რაციონალური კვება უმნიშვნელოვანესი პირობაა ჯანმრთელობის შენარჩუნებისთვის, ადამიანის ორგანიზმის ზრდისა და განვითარებისთვის. სწორი კვება საშუალებას მოგცემთ თავიდან აიცილოთ ქრონიკული დაავადებების რისკი, შეინარჩუნოთ ჯანმრთელობა და მიმზიდველი გარეგნობა, დარჩეთ მოხდენილები და ენერგიულები, დაძლიოთ დეპრესია, უხასიათობა და იყოთ ბედნიერნი.

მჯდომარე ცხოვრების წესი, 21-ე საუკუნის სენია. ტექნიკის განვითარებასთან ერთად ჩვენ კომფორტულ გარემოს ვიქმნით, სადაც სულ უფრო ნაკლებად გვიწევს მოძრაობა. ამერიკელმა მეცნიერებმა დაადგინეს, რომ დიდხანს ჯდომა სიცოცხლის ხანგრძლივობას მნიშვნელოვნად ამცირებს, რადგან ის იწვევს ისეთ სერიოზულ დაავადებებს, როგორიცაა კუნთების ათროპია, ჭარბი წონა, გულის პათოლოგიები, ოსტეოპოროზი და სხვ. ეს ყველაფერი არამხოლოდ ფიზიკურ ზიანს გვაყენებს, არამედ ჩვენ ფსიქიკაზეც მოქმედებს. იმისათვის, რომ ვიყოთ ჯანმრთელნი აუცილებელია ფიზიკური აქტოვობა, რომელიც გვიცავს ისეთი სერიოზული დაავადებებისაგან, როგორიცაა დიაბეტი, გულის დაავადებები, ართრიტი და ა.შ. ასეთი ფიზიკური აქტივობაა ველოსიპედით მგზავრობა. ველოსიპედით სიარული არის მარტივი და საუკეთესო ვარჯიში თქვენი კუნთებისთვის. ის ხელს უწყობს სისხლის მიმოქცევის გაუმჯობესებას, გულის და ფილტვების მუშაობას. როგორც მეცნიერებმა დაადგინს მათ, ვინც ველოსიპედით მგზავრობს ნაკლებად აწუხებთ კარდიოვასკულარული დაავადებები, ნაკლებად უბინძურდებათ ფილტვები მანქანის გამონაბოლქვისგან, არიან უფრო ჯანმრთელნი და გამოიყურებიან უფრო ახლგაზრდულად.

ბუნებაში სალაშქროდ გასვლა კიდევ ერთი საინტერესო ფიზიკური აქტივობაა. ეს პირდაპირ აისახება თქვენს ფიზიკურ სიჯანსაღეზე. სუფთა ჰაერზე, ჟანგბადით სავსე გარემოში ყოფნა აჯანსაღებს თქვენს სხეულს და ის ნაკლები დატვირთვით ფუნქციონირებს. რეგულირდება სისხლის წნევა და ძლიერდება იმუნური სისტემა. როდესაც ახალ-ახალი ადგილების სანახავად ზურგჩანთით მოკიდებული გადაადგილდებით, სეირნობთ ტყეში ან იპყრობთ მთებს, თქვენ განიცდით ფიზიკურ დატვირთვას და წვავთ უამრავ კალორიას. თქვენი კუნთები აქტიურდება და ეჩვევა მოძრაობას. თუ თქვენ მთელი კვირა სამსახურში ჯდომა გიწევთ და ფიზიკურად ნაკლებად აქტიური ბრძანდებით მაშინ, დამერწმუნეთ ბუნებაში ლაშქრობა სწორედ ისაა, რაც აუცილებლად გჭირდებათ. აქტიური მოლაშქრეები ფიზიკურ ჯანმრთელობასთან ერთად, მენტალური სიჯანსაღითაც გამოირჩევიან. რადგან ლაშქრობაში წასვლა, პირდაპირაა დაკავშირებული სტრესის კლებასა და თქვენი ხასიათის გაუმჯობესებასთან.