150-მეტრიანი ჩარჩოს ფორმის ნაგებობაზაბილის პარკში დგას და დუბაის სწრაფვასა და მის მიღწევებს წარმოადგენს. ბრწყინვალე სტრუქტურა ოქროს პატერნითაა დაფარული. კონსტრუქცია ღამით ნათდება და მინის ქვედა სავალ ბილიკს ანათებს. სწორედ აქედან დუბაის ულამაზესი ხედები მოსჩანს. თუ მონუმენტის ერთი მხრიდან გაიხედავთ, თქვენ დაინახავთ ქალაქის ძველ ნაწილს, ხოლო მეორე მხრიდან - ბურჯ ხალიფას. ნაგებობამ, თავისთავად, სწრაფადვე მიიზიდა ადამიანების ყურადღება და ტურისტული ატრაქციადაც იქცა. ჩარჩოს პირველ სართულზე მუზეუმები და შადრევნებია განთავსებული. სულ რაღაც 10 ევროს საფასურის გადახდის შემდეგ, ტურისტებს შეუძლიათ დაათვალიერონ საინტერესო გამოფენები, რომლებიც ემირატების ისტორიის შესახებ მოგვითხრობს.

მიუხედავად იმისა, რომ 50-სართულიანი სიმაღლის სტრუქტურამ, ყველაზე დიდი ჩარჩოს ტიტული მოიპოვა, მისი არქიტექტორი სხვა წოდების დამატებასაც აპირებს. ის თვლის, რომ ეს არის მთელი ისტორიის განმავლობაში ყველაზე დიდი მოპარული. 2008 წელს დუბაის მუნიციპალიტეტის მიერ საერთაშორისო კონკურსი ჩატარდა. ისინი ეძებდნენ საუკეთესო პროექტს, რომელიც ქალაქის ყველაზე ლამაზ და არაჩვეულებრივ ცათამბჯენს შექმნიდა. გამარჯვებული მექსიკელი არქიტექტორი ფერნანდო დონისი გახდა. ზუსტად მისი დიზაინი წარმოადგენდა ჩარჩოს ფორმის კონსტრუქციას. თუმცა, დროთა განმავლობაში, არქიტექტორი და დუბაის მუნიციპალიტეტის წარმომადგენლობა საკონტრაქტო პირობებზე ვერ შეთანხმდა. 2014 წელს კი მუნიციპალიტეტმა დონისის საავტორო უფლებები დაარღვია, შესაბამისად, არქიტექტორმა უკვე შეიტანა საჩივარი ინტელექტუალური საკუთრების მითვისების შესახებ.

ჩარჩო კიდევ ერთი სიურეალისტური სილუეტია, რომელიც ქალაქის დატვირთულ და მასიურ არქიტექტურას შეემატა. ის კილომეტრების დაშორებითაც კი ჩანს. მართკუთხედის ფორმა მისი მასშტაბების სწორად აღქმას ართულებს. თუ ამ ნაგებობას ერთი კუთხიდან შეხედავთ, ის სარეკლამო დაფას მოგაგონებთ, მეორე მხრივ კი, ისეთი განცდა გაგიჩნდებათ, თითქოს ვეება ტრიუმფალურ თაღს უყურებდეთ. როგორც აღვნიშნეთ, შენობამ უკვე მოახერხა ადამიანების ყურადღების მიქცევა და ეს ადგილი სელფების გადაღებისთვის პოპულარულ ტურისტულ დესტინაციად იქცა. აქვე, აქ მოსახვედრად, რამდენიმე წინაპირობა და აკრძალვა არსებობს. მაგალითად, თქვენ არ შეგიძლიათ იქონიოთ საჭმელი, სათამაშოები ან ბასრი ნივთები. აქ ცხოველები არ დაიშვებიან, მოწევა და „უპატივცემულო“ ჩაცმულობა კი აკრძალულია.