თუმცა, გრაფიტი კრიმინალად, ინსტალაცია კი უნიჭო ხელოვანის ახირებად კარგა ხანია აღარ ითვლება. გრაფიტი და ინსტალაცია სივრცის, არქიტექტურული მოცულობის გარეშე ვერც განვითარდებოდა, ამიტომ ბუნებრივია, რომ ინტერიერის დიზაინერები ცდილობენ თანამედროვე, მოცულობითი ხელოვნება რაც შეიძლება უხვად შეიტანონ საცხოვრებელ გარემოში. ეს კი ძალიან კარგად გამოსდით, რადგან თანამედროვე ხელოვნება ინდივიდუალობის გამოხატვის საუკეთესო საშუალებაა, რაც ყველა სტილთან კარგად ინტეგრირების საშუალებას იძლევა.

გრაფიტის ინტერიერის დიზაინში ძირითადად მხატვრობის დატვირთვა აქვს. გრაფიტული, ხულიგნური, მოხატულობა საცხოვრებელ სივრცეში მოულოდნელობის ეფექტს ქმნის. მნიშვნელობა არ აქვს, პატარა სტენსილი იქნება, თუ დიდი, აბსტრაქტული ნამუშევარი, გრაფიტულ მოხატულობას, თავისუფლების, ინდივიდუალობის განწყობა შემოაქვს სივრცეში. საინტერესოა ისიც, რომ კედლის მოხატვა მყვირალა ფერებითა და აბსტრაქტული კომპოზიციით თქვენც შეგიძლიათ. მთავარია გქონდეთ სათქმელი, აზრი, რომელიც იმსახურებს დიდი, ჭყეტელა ასოებითა და ნახატებით გაავსოს კედლის ზედაპირი. გრაფიტის ძირითადად შემოსასვლელების, კორიდორებისა და გალერეული სისტემის გასაცოცხლებლად იყენებენ. მართალია, ინტერიერის დიზაინში გრაფიტის თავისუფლების სოციალური იდეა იკარგება, მაგრამ თუ წმინდა ესთეტიური თვალსაზრისით გსიამოვნებთ მისი აღქმა, ოთახში გრაფიტის გამოყენება სავსებით გამართლებულია.