იოგას განსაკუთრებულობა იმაშია, რომ მისით ნებისმიერი ასაკის ადამიანს შეუძლია დაკავდეს. არ აქვს მნიშვნელობა რამდენი წლის ბრძანდებით, არც თქვენ სქესს აქვს მნიშვნელობა, იოგისთვის გვიანი არასდროსაა. მთავარია ამოირჩიოთ თქვენთვის სასურველი სტილი, რომლის მრავალფეროვნებასაც ნამდვილად გთავაზობთ ერთ-ერთი უძველესი დისციპლინა. არ აქვს მნიშვნელობა იოგას რომელ სტილს აირჩევთ, იქნება ეს ინტენსიური და ენერგიული სტილი, თუ რელაქსაციას და მედიტაციას ამჯობინებთ, ნებისმიერ შემთხვევაში თქვენ შეძლებთ სხეულის გაძლიერებას, გონებისა და სულის ჰარმონიაში მოქცევას.

როდესაც იოგათი დაკავდებით, მალევე იგრძნობთ ფიზიკურ სიძლიერესა და თქვენი სხეულის გაჯანსაღებას. ეს აქტივობა განსაკუთრებით კარგია მათთვის, ვისაც ართრიტი და ოსტეოპოროზი აწუხებს. იოგას დახმარებით თქვენ შეიძენთ მოქნილობას და ფიზიკურ ძალას, ზედმეტი დატვირთვის გარეშე. მეცნიერებმა დაადგინეს, რომ ამ დისციპლინით დაკავებულ ადამიანებს დარეგულირებული აქვთ სისხლის მიმოქცევა და წნევა. ისინი ადვილად უმკლავდებიან სტრესსა და დაძაბულობას, წელისა და თავის ტკივილებს.

როგორც უკვე აღვნიშნე იოგას დახმარებით თქვენ აჯანსაღებთ როგორც სხეულს, ისე გონებას. იოგას მთავარი აზრი იმაშია, რომ ჰარმონიაში მოიყვანოთ საკუთარი სხეული და გონება, ამაში ვარჯიშები და მედიტაცია დაგეხმარებათ. მედიტაცია გაგიუმჯობესებთ კონცენტრაციის უნარს, დაგეხმარებათ სიმშვიდის მოპოვებაში, რისი საშუალებითაც მარტივად დაამარცხებთ სტრესს და დაძაბულობას.

ალბათ დამეთანხმებით, რომ ამ ქაოტურ სამყაროში ჰაერივით გვჭირდება სიმშვიდე და სიჯანსაღე. იოგა კი ის აქტივობაა, რომელიც ამ სახის ფუფუნებას გვთავაზობს. გახსოვდეთ, რომ ეს არც დამღლელი ფიზიკური ვარჯიშია და არც დროის ფუჭად ფლანგვა, იოგა ცხოვრების წესია. წესი, რომელიც ნამდვილად შეგცვლით და გაგიმარტივებთ ცხოვრებას. ასე, რომ მოინდომეთ, გადადგით პირველი ნაბიჯი, დაკავდით იოგათი და სულ მალე იგრძნობთ, თუ როგორ იცვლებით თქვენც და თქვენს ირგვლივ არსებული გარემოც.