კლიმატურ ცვლილებას, რომელიც დედამიწას აქამდეც გამოუცდია, ამჯერად სათბურის ეფექტი იწვევს. მეცნიერები თანხმდებიან, რომ მთავარი მიზეზი ცვლილებებისა არის სწორედ ადამიანთა თანამედროვე საქმიანობით გამოწვეული შედეგები. რა თქმა უნდა, ეს პროცესი უცებ არ დაწყებულა და ჯერ არც დამთავრდება. ანთროპოგენული საქმიანობა ისტორიული წარსულის განმავლობაში ახდენდა გავლენას დედამიწის კლიმატზე, თუმცა პროცესები ჩვენგან შეუმჩნევლად მიმდინარეობდა. 1880 წლიდან საშუალო ტემპერატურა 0,8 გრადუსით გაიზარდა, რაც მთლიანი პლანეტის ზედაპირის მაჩვენებელია და საგანგაშოა. გლობალური დათბობის გამომწვევ მიზეზებში შედის ისეთი ანთროპოგენული საქმიანობები, როგორიცაა მიწის დამუშავება, ტროპიკული ტყეების განადგურება, ნამარხი ორგანული საწვავის წვა და საქონლის რაოდენობის ზრდა. ნამდვილად რთულია ამ საქმიანობების შეზღუდვა იმ ფონზე, როცა დედამიწის მოსახლეობა ყოველდღიურად იზრდება. თუმცა, მეცნიერების აზრით ბალანსი შესაძლებელია და აუცილებელიც, რადგან კლიმატურმა ცვლილებებმა პლანეტა უკვე საკმაოდ დააზიანეს.

ცოცხალი არსებები ფიზიკური გარემოში არსებობენ, ამ უკანასკნელის უმნიშვნელო ცვლილებაც კი, მათზე დიდ ზეგავლენას ახდენს. ტემპერატურულმა ცვლილებამაც შესაბამისად გამოიწვია გლობალური და რეგიონალური პრობლემები. ყველაზე მნიშვნელოვანი მათ შორის ყინულოვანი საფარის ფართობის მნიშვნელოვანი შემცირებაა: ეს ოკეანეების დონის ზრდას იწვევს, რისი ლოგიკური გაგრძელებაც ხმელეთის დატბორვა და ისეთი დასახლებების განადგურებაა, რომლებიც წყალთან ახლოს არიან. ყინულის საფარის განადგურებითაა გამოწვეული იქ მცხოვრები ცხოველების სიკვდილი და შეცვლა: ყველასთვის ცნობილია პოლარული დათვების მაგალითი, რომლებსაც საცხოვრებელი ფართობი აღარ ყოფნით და თბილი კლიმატის გამო უფრო ჩრდილოეთით მიიწევენ ვიდრე ოდესმე. ზოგადად, გლობალური დათბობის ეპოქაში ფაუნა, ისევე როგორც ფლორა, ცდილობს მისთვის სასურველი ტემპერატურული გარემო არ დათმოს, ამიტომაც საცხოვრებლად სხვა ადგილს ეძებს. რაც მათი გავრცელების არეალებს მთლიანად ცვლის. კლიმატური ცვლილებების ბრალია სტიქიური უბედურებების მოხშირება და განსაკუთრებელი სიძლიერე.

საინტერესოა, როგორ შეგვიძლია გამოვასწოროთ მდგომარეობა ან როგორ უნდა ვიცხოვროთ შეცვლილ გარემოში. ცხოვრების სტილის შეცვლა ჩვენც მოგვიწევს ისე, როგორც ეს პლანეტის ყველა ბინადარმა გააკეთა. გარემოს გამწვანება, ჯანსაღი გარემოს შექმნა და ეკო-მეგობრული ტექნიკის გამოყენება ის მცირე წვლილია, რაც საწყის ეტაპზე პლანეტის გადარჩენაში მონაწილეობისთვის შეგივძლია გავაკეთოთ.