მყუდრო, ნათელი ატმოსფეროს შესაბამისად, ბოლო პერიოდში მოდურად ითვლება ფლორალური შპალერი. ფლორალური, მასშტაბური პრინტი თითქოს ოჯახურ, მყუდრო გარემოს სძენს ინტერიერს. ამავდროულად, ძალიან ფემინურია და რაც მთავარია, არჩევანი დიდია. ბოლო დროს, ძალიან ბევრმა დიზაინერმა, საკუთარ კოლექციაში სხვადასხვა ფლორალური თუ მცენარეული მოტივების მქონე შპალერი შეიტანა. დიდი ყვავილის პრინტი იქნება ეს, თუ პალმის ან რომელიმე სხვა, ტროპიკული მცენარის ფოთლები, ის ნამდვილად შესძენს საუცხოოდ მყუდრო იერს საცხოვრებელ ატმოსფეროს. თუმცა, ეცადეთ ამგვარ შპალერს „ჩართული“, წმინდა დეკორატიული ხასიათი ჰქონდეს და ოთახის ყველა კედლის ზედაპირი არ დაფაროს. წინააღმდეგ შემთხვევაში ხასიათიც და სიმყუდროვეც უკვალოდ გაქრება და ვიქტორიანული ეპოქის სასაცილო გარემოში აღმოჩნდებით.

რაც შეეხება ფერს, ინტერიერის დიზაინერები ძირითადად პასტელურ, თბილ ფერებზე აკეთებენ არჩევანს, რომელიც ფერითა და ტექსტურით თითქოს კონტრასტში მოდის თანამედროვე ცხოვრების წესთან და ამ „ტექნოლოგიურ სტილს“ პასტელური ჩარჩოთი შემოსაზღვრულ სივრცეში სვამს. თუმცა, ეს რა თქმა უნდა, ინდივიდუალურია და მაცხოვრებლის, პროექტისა და დიზაინის ხასიათზეა დამოკიდებული.

ბუნებრივი გარემოდან ნასესხები ნახატი, ან ტექსტურა დღესდღეობით საკმაოდ პოპულარულია, ისევე, როგორც გეომეტრული პრინტი, რომელიც ეფექტითა და დატვირთვით სრულიად განსხვავდება „ბუნებრივისაგან“. გეომეტრიულ წყობას ჩვენს ინტერიერში თითქოს ცივი, მაგრამ კანონზომიერი ატმოსფერო შეაქვს. მათი გამოყენება ძირითადად პატარა სივრცეებში ხდება, რადგან ასეთი პრინტის შპალერი ვიზუალურად ზრდის ფოიეებსა და პატარა საძინებლებს.

აღსანიშნავია, რომ შპალერი ძალიან კარგი ხერხია მატერიასა და ტექსტურასთან „თამაშისას“. ამ დეკორატიული აქსესუარით, შეგიძლიათ ვიზუალით აკონტროლოთ სივრცის მოცულობა, ფართობი და რაც მთავარია განწყობა. მითუმეტეს, რომ შპალერის ბეჭდვის ტექნიკა ახლა ძალიან დაიხვეწა, რაც გაძლევთ საშუალებას დაბეჭდოთ ან დაამზადოთ სასურველი პრინტისა და მასალის მქონე კედლის აქსესუარი.