ინგლისური სახლის მოწყობის სტილი საკმაოდ კონსერვატული და ტრადიციულია. მთლიანობაში, იქმნება მყუდრო საცხოვრებელი სივრცე მკაცრი დეტალებით. ინგლისური სახლი ფორმალობისა და არა ფორმალობის იდეალური სინთეზია. ეს არის სახლი, რომელსაც გააჩნია ისტორია. აღსანიშნავია, რომ ბევრი დიზაინერი ასეთ სივრცეებზე საუბრისას აღნიშნავს, რომ დიზაინის თეორია უმნიშვნელო ხდება, მთავრი აქცენტი საგანზე გადადის. საგნების, ავეჯის, დეკორატიული, საინტერესო ნივთების სიმრავლე თქვენი პიროვნების ისტორიისა და ოჯახის წარმოჩენას ემსახურება. მიუხედავად ამისა, ინგლისური ინტერიერი არასოდესაა გადატვირთული, ის ყოველთვის ფუნქციაზეა ორიენტირებული და სახლის ყველა მაცხოვრებლის საჭიროებასა და ხასიათს წარმოაჩენს. სწორედ ამ ეკლექტიზმის გამო, სივრცე მედიდურ, გრაციოზულ, მაგრამ მეგობრულ შთაბეჭდილებას ტოვებს.

ყველაზე გამართლებული ასეთი ტიპის დიზაინის გამოყენება კოტეჯებსა და დიდ, ისტორიულ სახლებშია, მაგრამ წარმატებით შეიძლება შექმნათ საკუთარი ინგლისური სტილის სახლი ბინაშიც. ზოგადად, ასეთ სახლებში ფერთა პალიტრა უფრო მუქია, ვიდრე თანამდროვე სტილების უმრავლესობაში. იატაკის ზედაპირისთვისაც შედარებით მუქი ხის ტონალობის არჩევა მოგიწევთ. რაც შეეხება კედლების ზედაპირებს, ის ძირითადად შპალერითაა მორთული, რომელიც თავის მხრივ უხვადაა დეკორირებული და ტრადიციული პრინტი აქვს, რომელიც ხელით ნახატს უფრო მოგაგონებთ, ვიდრე მასობრივ წარმოებას.

ფლორალურ მოტივებსა და პრინტებს ინგლისურ ინტერიერში საკმაოდ დიდი ადგილი უჭირავს. წიგნების თაროებითა და ანტიკვარული ნივთებით მდიდარ ინტერიერში ავეჯის მატერია ხშირად ფლორალური პრინტით, ან პასტელური ფერით გამოირჩევა. ზოგადად ავეჯი რაც შეიძლება გამძლე, კომფორტული თუმცა მკაცრი უნდა იყოს.

შეიძლება ითქვას, რომ სახლის ინგლისური სტილით მოწყობისას მინიმალიზმს მნიშვნელობა ეკარგება, ამ სივრცეში თქვენ უნდა იამაყოთ, საკუთარი ცხოვრებით და აჩვენოთ ჩარჩოებში მოქცეული ინდივიდუალიზმი. ინსპირაციისთვის ნამდვილად დაგეხმარებათ ძველმანების ბაზრობაზე ვაჭრობა, ბებიების მოთხრობილი ისტორიები და ფინჯანი ჩაი.