აღსანიშნავია, რომ არქიტექტურაზე გარე ფაქტორებიც მნიშვნელოვნად მოქმედებს. ამის საუკეთესო მაგალითია მავრიტანული არქიტექტურა ევროპაში. ამ სტილის საინტერესო მოგზაურობა კონტინენტზე მერვე საუკუნეში იწყება. მავრებმა, დაიპყრეს ხმელთაშუა ზღვის ტერიტორია, ესპანეთი და საკუთარი სტილიც შემოიტანეს. ჩრდილო-აფრიკაში მცხოვრები მავრები ისლამური არქიტექტურის გავლენის ქვეშ იყვნენ, რამაც გამოიწვია სახასიათო მოტივების გამეორება, შეისრული და ნალის ფორმის თაღები, ორნამენტების სიუხვე და ფასადის მდიდრული გეომეტრიული შემკობა.

ამ პერიოდის მავრიტანული არქიტექტურის როლის განსასაზღვრად საკმარისია კორდობის დიდი მეჩეთის გახსენებაც. აქ ერთადაა მოქცეული კათოლიკური და ისლამური სალოცავი სივრცეები, კორდობის დიდი მეჩეთი ულამაზესია და ის შეიძლება არქიტექტურული და რელიგიური ეკლექტიკის პირველ ნიმუშად ჩაითვალოს. მიუხედავად იმისა, რომ ახლა კორდობის ტაძარში მხოლოდ ქრისტიანული მსახურება ტარდება, ეს მავრიტანული მეჩეთის სივრცეში ხდება. თითქოს ლამაზი, ისლამური თაღების გავლის შემდეგ ხვდები კათოლიკური ტაძრის სივრცეში. სწორედ ეს ადასტურებს იმას, რომ ევროპამ არ მიიღო რელიგია, მაგრამ მიიღო არქიტექტურა.

საინტერესოა, რომ მავრიტანულ არქიტექტურას ევროპაში თავი ამით არ ამოუწურავს. მეცხრამეტე საუკუნეში, როცა მთელი ევროპა ეკლექტიზმმა მოიცვა, ორნამენტისა და მორთულობის ძიებაში არქიტექტორებმა მავრიტანული ტაძრები ხელახლა აღმოაჩინეს, ოღონდ ამჯერად, მავრიტანული მოტივები საზოგადოებრივ შენობებსა და სახლებს ამშვენებდა და არა ტაძრებს. ზოგადად კონტინენტის აზიისკენ სწრაფვამ და ინტერესმა მეცხრამეტე საუკუნის ბოლოსთვის ისლამური მოტივები ევროპულ სივრცეებში შეიტანა. თბილისი ამ ტრენდს არ ჩამორჩენია და მავრიტანული ეკლექტიკის მაგალითები ჩვენს ქალაქშიც მოიძებნება: ყოფილი საკრებულოს შენობა, არქიტექტორი შტერნის სახლი და რაც მთავარია ოპერა, რომელიც მავრიტანული მოცულობის ერთ-ერთი საუკეთესო მაგალითია რეგიონში. თუმცა, უნდა აღინიშნოს, რომ ძველი თბილისისთვის არქიტექტურული სიჭრელე, მათ შორის ისლამური სტილი ბევრად უფრო ორგანულია, ვიდრე ევროპისთვის.

მავრიტანული და ისლამური მოტივები პოპულარულია თანამედროვეობაშიც, ოღონდ არა ფასადზე, არამედ ინტერიერში. შეგიძლიათ საკუთარ საცხოვრებელში აღმოსავლური ეგზოტიკა და სიზუსტე ხალიჩით ან ჩრდილო აფრიკული კერამიკული ფილებით შემოიტანოთ.