ერთ-ერთი ყველაზე საოცარი მეტროსადგური შანხაიში, კერძოდ, მის უბან ბანდში გვხვდება. ბანდის ღირსშესანიშნავი გვირაბი, ფაქტობრივად ვირტუალური ადგილია. მატარებლის კუპე გამჭვირვალეა და ის 360 გრადუსიან ხედს გთავაზობთ. 6-არხიანი სისტემა, მულტიმედიური და ხმის ეფექტები ხედს ცვლის. ეს ყველაფერი კი 3D ეფექტს ქმნის. კუპე ავტომატურად იმართება. მთლიანი გვირაბის შემოვლა 3-5 წუთშია შესაძლებელი. გვირაბი აღჭურვილია 12 ესკალატორით და ოთხი ვერტიკალური ლიფტით. ორი მათგანი შეზღუდული შესაძლებლობების მქონე პირებისთვისაა განკუთვნილი.

თუ იტალიას, კერძოდ, ნეაპოლს ესტუმრებით, აუცილებლად ჩადით მეტროში. ეს ულამაზესი მეტროსადგური მეტროს ხელოვნების პროგრამაშია ჩართული და რიგით მეცამეტეა. ის 2012 წელს გაიხსნა. დიზაინი ესპანურ არქიტექტურულ ფირმას „ოსკარ ბლანკას“ ეკუთვნის. კედლები და იატაკი მინის მოზაიკით არის დაფარული, რაც წყალქვეშა შეგრძნებებს მოგაგონებთ. რაც შეეხება მხატვრობას, ის კრიტიკოსის არჩილ ბონიტო ოლივას მიერ შემუშავდა. სინათლის პანელები კი რობერტ ვილსონმა შექმნა.

საოცარი ინტერიერით გვაოცებს ჩეხი დიზაინერის, ჟიტკა სკუჰრავას ქმნილება დუბაის მეტროსადგურში, რომელიც ბურჯუმანას სავაჭრო ცენტრში მდებარეობს. მდიდრული წყლის განათების სკულპტურა მეტროსადგურის ჭერში ჰკიდია. არტისტულ სკულპტურას ზედმეტსახელად გიგანტურ მედუზასაც უწოდებენ. ის შეიძლება 2 სხვადასხვა ნაწილად დავინახოთ. ერთი, რომელიც გადაჭიმული მინისგან შექმნილი ტექსტურაა და ფუძეს ქმნის. მეორე კი, როგორც, „ჩანჩქერი“, რომელიც მინაზე გადმოდის. სკულპტურებს LED-სა და RGB-ზე დაფუძნებული ოპტიკური ბოჭკოები ქმნის.

სტიმპანკური სტილი ახალი სულაც არ არის, მაგრამ სტიმპანკური მეტროსადგური ნამდვილად უცნაური ნამუშევარია. მსგავსი რეტრო-ფუტურისტული ხელოვნების ნიმუში პარიზში გვხვდება. 11 პლატფორმისგან შემდგარი „Arts et Métiers“ სადგური სტიმპანკის მოყვარულებისთვის ნამდვილი სამოთხეა. დიზაინი ცნობილ შემოქმედს ფრანცუიზ შუიტენს ეკუთვნის, რომელმაც მეტროსადგური ჟიულ ვერნის სამყაროდ აქცია. მეტროსადგური წარმოადგენს სამეცნიერო-ფენტეზით ინსპირირებულ პორტალს, რომელიც ინახავს არაჩვეულებრივ გამოგონებებსა და ისტორიულ მეცნიერულ ინსტრუმენტებს.