აფრიკასა და სამხრეთ ამერიკაში სულ ცოტა ხნის წინ გავრცელდა მშენებლობის ისეთი ტექნიკა, რომელმაც შესაძლოა უსახლკაროებისა და ეკოლოგიური პრობლემები ერთდროულად გადაჭრას. საქმე იმაშია, რომ აფრიკაში მოსახელობამ გადაწყვიტა პლასტმასის ბოთლებისგან სახლები აშენოს. რაც არ უნდა გასაკვირი იყოს, შედეგად საკმაოდ მყარ კონსტრუქციას ვიღებთ. „ბოთლების კედლის ტექნიკა“ გერმანულმა კომპანიამ, Ecotec Environmental Solutions გამოიგონა. სწორედ კომპანია ატარებს ტრეინინგებს ნიგერიაში, ქვეყანაში, სადაც 16 მილიონ ადამიანს არ აქვს თავშესაფარი. პროცესი ძალიან მარტივია: თავდაპირველად გროვდება ბოთლები და ისინი ქვიშით ივსება. უკვე ავსებული ბოთლების წყობა კი ერთმანეთს ტალახით ან ცემენტით უკავშირდება. სტრუქტურა საკმაოდ მჭიდრო და უჩვეულოდ მყარია (ოცჯერ მყარი, ვიდრე აგურის კედელი), ამბობენ, რომ ასე აშენებული სახლი ცეცხლგამძლე და ტყვიაგამძლეა. ტიპიური, 2 საძინებლიანი სახლის აშენება, სველი წერტილითა და სამზარეულოთი სულ 14 000 პლასტმასის ბოთლს მოითხოვს და საბოლოო ჯამში იმის მეოთხედი ჯდება, რაც ტრადიციული მასალით აშენებული მსგავსი სახლი.

ამ ტექნოლოგიას მსოფლიოს მასშტაბით სულ უფრო და უფრო მეტი ადამიანი იყენებს. ცემენტის გამოყენების გარეშე, 8000 ბოთლით იქნა აშენებული ეკო-სახლი ჰონდურასის ეკოპარკში. სწორედ ეს სახლი იჭერს მწვანე გადახურვასაც, რომლის მასა დატენიანებისას 30 ტონასაც აღწევს. რაც შეეხება დიზაინს, ფერადი ბოთლის თავსახურები და მათი სხვადასხვანაირი წყობა საინტერესო კონცეფციებს ქმნის ინტერიერსა და ექსტერიერზე.

ასეთი სახის მუშაობა ბევრი ადამიანის დასაქმებას მოითხოვს: ბოთლების დაწყობასა და მათ ქვიშით ავსებას საკმაოდ დიდი შრომა სჭირდება. მიუხედავად იმისა, რომ ამ ტექნიკას ძირითადად განვითარებადი ქვეყნები იყენებენ, გერმანული კომპანია ფიქრობს, რომ ასეთი მშენებლობა უნდა დანერგოს ყველა იმ ქვეყანამ, სადაც მიუსაფარ ხალხთა რაოდენობა დიდია.