ფოტოგრაფია ის პოპულარული ჰობია, რომლითაც ძალიან ბევრი ადამიანია გატაცებული. ეს არც არის გასაკვირი, რადგან ის გვანიჭებს სამყაროს აღქმის ახალ შესაძლებლობებს და ყოველი განსაკუთრებული წამის დაფიქსირების საშუალებას. ბევრი ადამიანისთვის ეს არის თვითგამოხატვისა და ადამიანებთან ურთიერთობის შესაძლებლობა. ფოტოგრაფიის განსაკუთრებულობა იმაში მდგომარეობს, რომ ნებისმიერი ასაკის ადამიანს შეუძლია დაკავდეს ამ საინტერესო ჰობით. თქვენი გადაღებული ფოტოები დაგაკავშირებთ წარსულთან, ძველ ემოციებთან და სასიამოვნო მოგონებებთან, თუ თქვენ გადაწყვეტთ დაკავდეთ ფოტოგრაფიით ნამდვილად არ ინანებთ, იქნებით მუდმივ ძიებაში და ყოველთვის დაიჭერთ იმ წამს, რომელსაც თქვენთვის დიდი მნიშვნელობა აქვს.

ხატვა, პირველ რიგში საკუთარი თავის, თქვენი გრძნობების, ფიქრების, განცდების გამოხატვის საუკეთესო საშუალებაა და ის მოზრდილებს ისევე გვჭირდება, როგორც ბავშვებს. გახსოვდეთ, რომ ხატვის დროს თქვენ ძალიან მარტივად შეძლებთ დამშვიდებას, როგორც გონებრივი, ისე ფიზიკური სტრესისა და დაძაბულობის მოხსნას. მეცნიერებმა დაამტკიცეს, რომ ხატვისას ვითარდება ტვინის როგორც მარჯვენა, ისე მარცხენა ნახევარსფერო, ასევე კონცენტრაციის და მოტორული უნარები. იწვრთნება თქვენი ხელები და თვალები. ხატვა, განსაკუთრებით სასარგებლოა ბავშვებისთვის. ის ხელს უწყობს მათი ცენტრალური ნერვული სისტემის, სენსორული და მოტორული უნარების განვითარებას. ასევე ანვითარებს მეხსიერების, აზროვნების და მეტყველების უნარებს. ასე, რომ თუ ბავშვები გყავთ არასდროს დაუშალოთ მათ ხატვა. ეცადეთ მათთან ერთად ამ საქმით ხშირად დაკავდეს.

კიდევ ერთი საინტერესო ჰობი მცენარეების მოვლაა. იცოდით, რომ ისინი ადამიანს აბედნიერებენ? კვლევებით დასტურდება, რომ მცენარეების გავლენით ადამიანი ებრძვის სტრესს, დაძაბულობასა და შფოთვას. მცენარეებით სავსე გარემო ზრდის სიმშვიდის, სტაბილურობისა და ოპტიმიზმის შეგრძნებას. მატებს ადამიანს თვითრწმენასა და საკუთარი თავის სიყვარულს, რაც საერთო ჯამში მას აბედნიერებს. ასე, რომ ნუ მოერიდებით სახლში სხვადასხვა ქოთნის მცენარის გაზრდას. მაქსიმალურად აითვისეთ ცარიელი ადგილები, გააფორმეთ აივნები, მოაჯირები. ეს გაალამაზებს და საოცრად დადებითი მუხტით აავსებს თქვენს საცხოვრებელ გარემოს. ცოცხალ არსებაზე ზრუნვა ყოველთვის ეხმარება ადამიანს დეპრესიის დაძლევაში და შემეცნებითი ფუნქციის განვითარებაში. ისინი, ხომ სხვა ბევრ კეთილ საქმესთან ერთად აუმჯობესებენ კონცენტრაციას, მეხსიერებას და მიზანსწრაფულობას.

როგორც უამრავმა კვლევამ აჩვენა ხელსაქმე დადებითად მოქმედებს ადამიანზე, მის ფიზიკურ და მენტალურ მხარეზე. თუ თქვენ ყოველდღიურობისგან გადაღლილი ბრძანდებით, მაშინ დროა დაკავდეთ ისეთი ხელობით, რომელიც მოგანიჭებთ ბედნიერებას და დადებითად აისახება თქვენზე. მეცნიერები ადასტურებენ, რომ ქსოვა, ქარგვა, კერვა, ხეზე და თიხაზე მუშაობა ადამიანის ტვინს ეხმარება გამოჰყოს ჰორმონი დოპამინი, რაც თქვენს ხასიათს აუმჯობესებს და სიმშვიდეს ჰგვრის. განვითარებულ ქვეყნებში კარგად დანერგილი პრაქტიკაა ქსოვის და თიხის თერაპია. უამრავი ადამიანი, რომელიც ამ ხელსაქმითაა დაკავებული აღიარებს, რომ მათი ცხოვრება საგრძნობლად გაუმჯობესდა მას შემდეგ, რაც ამ ხელობების შესწავლა დაიწყეს. ისინი თავს უფრო ბედნიერად გრძნობენ და ეს ყველაფერი, სწორედ საყვარელი საქმიანობის პოვნამ განაპირობა.