ჯანსაღი კვება გულისხმობს პროდუქტების მრავალფეროვნებას, ბალანსირებულ რაციონს, გემრიელ და სასარგებლო კერძებს. რაციონალური კვება უმნიშვნელოვანესი პირობაა ჯანმრთელობის შენარჩუნებისთვის, ადამიანის ორგანიზმის ზრდისა და განვითარებისთვის. ჯანმრთელობის დაცვის მსოფლიო ორგანიზაციის მონაცემების მიხედვით, ჯანმრთელობის მდგომარეობას, 70%-ით განსაზღვრავს ცხოვრების წესი და კვება, 15%-ით სამედიცინო სამსახურის ორგანიზაცია, 15%-ით კი გენეტიკური თავისებურებები. ასე, რომ სანამ ამ უკანასკნელით ყველანაირ იმედებს გადაიწურავთ, იცოდეთ, რომ ყველაფერი თქვენს ხელშია. თქვენი დამოკიდებულება კვებისა და ჯანსაღი ცხოვრების წესის მიმართ უფრო მნიშვნელოვანია, ვიდრე სხვა ნებისმიერი ფაქტორი. სწორი კვება საშუალებას მოგცემთ თავიდან აიცილოთ ქრონიკული დაავადებების რისკი, შეინარჩუნოთ ჯანმრთელობა და მიმზიდველი გარეგნობა, დარჩეთ მოხდენილები და ენერგიულები, დაძლიოთ დეპრესია, უხასიათობა და იყოთ ბედნიერნი.

იმისთვის, რომ ადამიანმა სწორად იკვებოს, ყურადღება, ნებისყოფა და გარკვეული ცოდნაც სჭირდება. აქ მნიშვნელოვანია არა მარტო ის, თუ რას ვჭამთ, არამედ ისიც, თუ რა დროს, რა რაოდენობით ვჭამთ. უკეთესი იქნება, თუ თქვენი ყოველდღიური კვების რეჟიმი, თავიდან მკაცრად გექნებათ განსაზღვრული. დღეში ხუთჯერადი კვება (08:00; 12:00; 15:00; 18:00; 21:00;) ყველაზე მისაღები განაწილებაა ჯანმრთელი ორგანიზმისთვის. თუ საღამოობით ჭამას ერიდებით, შეგიძლიათ 21:00-ზე აღარ ივახშმოთ, ოღონდ ეცადეთ, დილით და შუადღით უკეთ დანაყრდეთ. არ გამოტოვოთ საუზმე, ის ყველაზე მნიშვნელოვანია. თუ თქვენ საერთოდ არ საუზმობთ დააძალეთ საკუთარ თავს და დილა ნოყიერი და გემრიელი საუზმით დაიწყეთ. ეს აგავსებთ ენერგიით და თქვენს განწყობასა და აზროვნების უნარზეც დადებითად იმოქმედებს.

რა თქმა უნდა თავიდან ეს ყველაფერი რთულად მოგეჩვენებათ და ალბათ დაგეზარებათ კიდეც ჯანსაღად კვება, მაგრამ აუცილებლად დაფიქრდით იმაზე, თუ რა დადებითი შედეგი ექნება ამ ყველაფერს. ნელ-ნელა ჩაანაცვლეთ თქვენი ორგანიზმისთვის არასასურველი პროდუქტები ჯანსაღი საკვებით. ერთბაშად ყველაფერზე უარი არ თქვათ, უბრალოდ შეამცირეთ საყვარელი სასუსნავის ან კერძის ულუფა, შემდეგ კი მათზე მოთხოვნილებაც ნელ-ნელა გაქრება. გახსოვდეთ, რომ არაფერია მნიშვნელოვანი თქვენ ჯანმრთელობაზე, სწორი კვება კი მის შენარჩუნებაში დაგეხმარებათ.