დიზაინერი ივეს ბეჰარი და პროფესორი კენტ ლარსონი ამ პროექტზე დაახლოებით 4 წლის განმავლობაში მუშაობდნენ. საწოლის, სამუშაო მაგიდისა და კარადის ტანდემი შემუშავდა იმ ადამიანებისთვის, რომლებიც ურბანულ გარემოში პატარა სახლებში ცხოვრობენ და სივრცის პრობლემა აქვთ. „Ori”-ს დამფუძნებლებმა ისეთი ტექნიკა შეიმუშავეს, რომელიც 100 პროცენტით აკმაყოფილებს ურბანისტების მოთხოვნებსა და აღჭურვილია უახლესი ტექნოლოგიური მიღწევებით. ავეჯის მართვა სმარტფონებით, სპეციალურად შექმნილი აპლიკაციით არის შესაძლებელი. მხოლოდ ერთ ღილაკზე დაჭერით, ავეჯი საწოლიდან სამუშაო ადგილადაც კი შეგიძლიათ გადააქციოთ. მთავარი კითხვა, რაც რობოტული ავეჯის შექმნის სამუშაო პროცესის დროს დაისვა იყო ის, თუ როგორ გაეერთიანებინათ ელექტრონული ინჟინერია და არქიტექტურა ერთმანეთთან. ამ ყველაფერს, რა თქმა უნდა, პრობლემებიც თან ახლდა. ამათგან შემქმნელები სამ უმთავრესს გამოყოფენ: 1. სივრცის პრობლემა - რადგან რთულია ერთ პატარა სივრცეში ერთდროულად სამი აქტივობა მიმდინარეობდეს; 2. საძინებელი საწოლის დიზაინი და კონკრეტული ადგილის ძებნა, სად უნდა დაედგათ; 3. კარადის ფუნქციის დამატება.

რობოტი ავეჯი დამზადებულია ალვის ხის პანელისგან. მრავალფუნქციურობის მიუხედავად, მთელი სისტემა მსუბუქი და გამძლეა. ამავდროულად ის ელექტრონულია, რის დროსაც ავეჯი ბორბლიანი ხდება და ადამიანებს მისი გადაადგილება მარტივად შეუძლიათ. Ori-ს სისტემის ავეჯი მოდულარობისთვის არის განკუთვნილი. სამწუხაროდ, მომხმარებელს ჯერ მისი შეძენა არ შეუძლია, მსურველებმა კიდევ ცოტა ხანი უნდა მოითმინონ. Ori-ს კომპანიის შემქმნელები დიდ დეველოპერებთან თანამშრომლობენ, რათა მოახდინონ პროდუქტის მარკეტზე გამოტანა და იმის ჩვენება, თუ რისი გაკეთება შეუძლია ამ არაჩვეულებრივ ავეჯს. რაც შეეხება ფასს, როგორც აღმოჩნდა, რობოტი ავეჯი იაფი სიამოვნება სულაც არაა. მისი ფასი 10 000 $-იდან დაიწყება. როგორც შემქმნელები ამბობენ, ფასის სიდიდე არა ავეჯის რობოტოტექნიკამ განაპირობა, არამედ თავად ავეჯმა.