ჩვენი ყოველდღიური რუტინა ზედმეტად მომქანცველია. ამ ყველაფერში დიდ წილად კომპიუტერია „დამნაშავე“. თქვენთვის არ უნდა იყოს უცნობი თავისა და კისრის ტკივილი, თვალების მუდმივი დაძაბულობა, ფიზიკური და გონებრივი გადაღლა, რასაც ტელევიზორის, კომპიუტერის, პლანშეტების თუ მობილურის გამოყენება იწვევს. თუმცა მხოლოდ დაღლილობის შეგრძნება არაა მთავარი საფრხთე...

ეკრანების უმეტესობა, ცისფერ ნათებას ასხივებს, რასაც მეორენაირად მაღალი სიმძლავრის სინათლის ტალღებს უწოდებენ. კვლევებმა დაადასტურა, რომ კომპიუტერთან ხანგრძლივი მუშაობის შედეგად ადამიანებს აღენიშნებათ მხედველობითი სისტემის გადაღლილობა. ამ ფაქტორს მოგვიანებით „მხედველობითი კომპიუტერული სინდრომი“ უწოდეს. კომპიუტერთან დიდხანს ჯდომა ნამდვილად აქვეითებს ჩვენ მხედველობას. 
მათთვის, ვისთვისაც გარდაუვალია ეკრანთან ჯდომა 2 საათზე მეტი დროით, აუცილებელია თვალის ვარჯიშების გაკეთება. ეს არ მოითხოვს დიდ ძალისხმევას და დროს. მათი დახმარებით თქვენ გაავარჯიშებთ თვალის კუნთებს და მოიხსნით დაძაბულობას.

- დააკარით ფანჯარაზე 5 მმ. დიამეტრის წითელი ან შავი წერტილი. უყურეთ რამდენიმე წუთის განმავლობაში შემდეგ კი მზერა გადაიტანეთ ფანჯრის მიღმა შორს მდებარე საგანზე. ეს ვარჯიში გააკეთეთ ხუთი წუთის განმავლობაში, დღეში ერთხელ. 
- გაასწორეთ ხელები მხრების სიმაღლეზე და მზერა დააფიქსირეთ საჩვენებლ თითზე. თითი მიიტანეთ ცხვირთან, მიაყოლეთ მზერა შემდეგ კი გადაიტანეთ შორს მდებარე საგანზე. გაიმეორეთ ეს ვარჯიში რამდენჯერმე. 
- სწრაფად დაახამხამეთ თვალები 1-2 წუთის განმავლობაში, შემდეგ დახუჭეთ თვალები და ერთი წუთი, თითების ბალიშებით, მსუბუქი მასაჟი ჩაიტარეთ. ეს პროცედურა ადუნებს თვალის კუნთებს და აუმჯობესებს სისხლის მიმოქცევას. 
- თვალები მაგრად დახუჭეთ, შემდეგ გაახილეთ, გაიმეორეთ 8-10 – ჯერ. ატრიალეთ თვალის კაკლები ჯერ ერთ, მერე მეორე მხარეს 6-8 – ჯერ. აიღეთ ფანქარი, მზერა დააფიქსირეთ მის წვერზე და მიუახლოვეთ თვალებს 5-7 სმ-ის მანძილზე, შემდეგ დააშორეთ გაწვდენილი ხელის მანძილზე. გაიმეორეთ ეს ვარჯიში 6-ჯერ. 
მხედველობის პრობლემა არ არის ერთადერთი, რასაც კომპიუტერთან დიდხანს კონტაქტი იწვევს. ბიოლოგიური საათის არევა, ჰორმონალური დისბალანსი, უძილობა, ემოციური, ფიზიკური თუ გონებრივი გადაღლა, გაფანტულობა... სამწუხაროდ ეს ჩვენი რეალობაა. ამიტომ, არასდროს უნდა დავიზაროთ იმ მსუბუქი ვარჯიშებისა თუ პროცედურების ჩატარება, რომლებიც გვეხმარება ჯანმრთელობის შენარჩუნებაში და დაღლილობის მოხსნაში, რადგან არაფერია ჩვენს ჯანმრთელობაზე მნიშვნელოვანი.