შობა-ახალი წელი ტივოლი გარდენსშიც ულამაზესად გამოიყურება. სწორედ ამ სილამაზის გამო, კოპენჰაგენს, ზამთრის პერიოდში, უამრავი ტურისტი სტუმრობს. ულამაზესი სინათლის შოუ ირეკლავს მდინარეს და წარმოუდგენლად მშვენიერ სანახაობას ქმნის. ზღაპრული განათება და საშობაო-საახალწლო მუსიკა ერთად უნიკალურ ატმოსფეროს ქმნის. სამი ერთმანეთისგან განცალკევებული სინათლის შოუ ხუთი წუთის განმავლობაში გრძელდება, ხოლო ერთი საღამოს განმავლობაში ის შეიძლება უამრავჯერ ნახოთ. აქ ასევე 60 საშობაო ჯიხურსაც შეხვდებით, სადაც საჭმელს, ცხელ სასმელებსა თუ ხელით შექმნილ ნივთებს ყიდიან.

ზღაპრისა თუ მითოლოგიის პერსონაჟები, ტყეები, ცხოველები, სუნები და ფერები, ჩრდილოეთის ციალი, მოზაიკები, ყველაზე ხშირად გამოყენებული საახალწლო ელემენტები - ეს ყველაფერი იტალიაში, სალერნოში შეგხვდებათ. თითოეული დეტალი დამთვალიერებელს სასიამოვნოდ გაოცებულს ტოვებს. განათებული ცხოველები ბუნების დაცვისკენ მოგვიწოდებენ. სასაცილო სათამაშო პინგვინები კი იქაურობას ანტარქტიკულ ყინულად გარდაქმნიან. ულამაზესი შუქების წარმოდგენა ყოველ წელს აქტუალურია. შობა-ახალი წლის განმავლობაში, არტისტების დიდი რაოდენობა სხვადასხვა განათებულ ინსტალაციებს ქმნის. ისინი უფრო მეტად საინტერესო რომ გახადონ, 4 თემას ირჩევენ ხოლმე. ესენია: მითები, ოცნება, დრო და შობა-ახალი წელი.

ფილიპინებში მდებარე „Policarpio Street“ კი ტურისტებს თავისი ატრაქციონებით იზიდავს: ეს არის ათასობით საახალწლო ნათურით განათებული და სანტა კლაუსებით გადავსებული სახლები. ამ ყველაფრის ავტორი კარმენ სუვაა, რომელიც ბედნიერ და გახარებულ ადამიანებზე გიჟდება. ამიტომ გადაწყვიტა სანტების კოლექცია შეეგროვებინა: ქანდაკებები, სათამაშოები, ადამიანის ზომის ფიგურები. ეს ქუჩა საახალწლოდ ნამდვილად ჯადოსნურ სამყაროს ემსგავსება.

უკვე 21 წელია, რაც იაპონიაში ყველაზე ცნობილი სინათლის შოუ იმართება. წლევანდელი ფესტივალი კი იმ დაზარალებულ ადამიანებს მიეძღვნება, რომლებიც 1995 წლის მიწისძვრას შეეწირნენ. აქ 200 000-ზე მეტ ხელით მოხატულ განათებას გამოიყენებენ.