სწორედ „სწორი შთაგონების“ მოსაძებნად და ინოვაციური იდეების გასაზიარებლად არსებობს ყოველწლიური გამოფენა KBIS (Kitchen and Bath Industry Show), სადაც ყველა გემოვნების ადამიანი იპოვის საოცნებო სააბაზანო სივრცეს. KBIS- ის გამოფენას უფრო ახლოს მოაქვს მომხმარებელთან დიზაინერის კონცეფცია, რითაც განსაზღვრავს ძირითად მიმართულებებს ორი მნიშვნელოვანი სათავსოს, სააბაზანოსა და სამზარეულოს მოწყობისას. 2016 წლის გამოფენაზეც განისაზღვრა რამდენიმე „ტრენდი“, რომლებიც კიდევ რამდენიმე წელი არ დაკარგავს აქტუალობას.

პირველ რიგში, განვსაზღვროთ რა მასალით უნდა მოეწყოს თანამედროვე სააბაზანო. ზოგადად, ბოლო დროის ინტერიერი ცდილობს ყველა სტერეოტიპი დაანგრიოს, მხოლოდ იმიტომ, რომ ეს შესაძლებელია - თანამედროვე ადამიანს სივრცეში სულ უფრო და უფრო ნაკლები შეზღუდვა აქვს. სწორედ ამიტომ, აქტუალურია სათავსოებში „მოულოდნელი“ მასალის გამოყენება. სააბაზანოს შემთხვევაში ეს უჩვეულო მატერია არის ხე. დიზაინერები გვირჩევენ, რომ ხის სიმყუდროვე და თბილი განწყობა სააბაზანოს ზედაპირზე და დეკორში თამამად შევიტანოთ - ამ მასალის დამუშავების ახალი მეთოდები გვაძლევს საშუალებას ის აქამდე „ტაბუდადებულ“ სივრცეებშიც შევიტანოთ. ხის გამოყენება სასურველია კედლის ან თუნდაც იატაკის ზედაპირად, კიბის მასალად (თუკი სივრცე ამას მოითხოვს) და ნიჟარადაც კი. ხის გარდა, სააბაზანოს სივრცეში აქტუალურია მეტალიც. ნატურალურ მასალასთან გამოყენების შემთხვევაში იგი განსაკუთრებულ კონტრასტს ქმნის და სივრცის ზედაპირი მთლიანობაში მინიმალისტური, მაგრამ მრავალფეროვანია.

ისეთ სივრცეში, როგორიც სააბაზანოა, ტონალობასა და ზოგადად ატმოსფეროს დიდი მნიშვნელობა ენიჭება. ინტერიერის დიზაინერების აზრით, რემონტისას არჩევანი ცივ ფერებზე უნდა შევაჩეროთ. დიზაინერი, კარმელ დი, ფიქრობს, რომ თანამედროვე სააბაზანოსთვის იდეალური ფერებია ლურჯისა და ზურმუხტისფერის სხვადასხვა ტონალობები და მათი შეხამება თეთრ ფერთან. თეთრ ფერს განსაკუთრებული მნიშვნელობა ენიჭება ამ სივრცეში: პატარა სააბაზანოებში იგი სივრცის ილუზიას და სისუფთავის შეგრძნებას ქმნის, რაც სათავსოსთვის აუცილებელია. რა თქმა უნდა, შეგიძლიათ ფერები თავად აარჩიოთ, თუმცა ეცადეთ ისინი თეთრთან ერთად გამოიყენოთ და არჩევანი შედარებით ცივ ტონალობაზე შეაჩეროთ, რადგან სააბაზანოს ამრეკლ ზედაპირთან ერთად ისინი სუფთა კომპოზიციას ქმნიან, რაც ხშირად წყლის ილუზიასაც კი იწვევს

თანამედროვე სააბაზანო ცდილობს გახდეს უფრო თბილი და საჭირო სივრცე, ამიტომაც მასში ბუნების ელემენტების შეტანა, დეკორაციის სახით ძალიან მოდურია. ხის მასალითა და თეთრი ფილებით გადაწყვეტილ სივრცეში მწვანეს განსაკუთრებული ეფექტი შეაქვს. გარდა ამისა, შეგიძლიათ თავად ფილებიც აქციოთ დეკორად: ორიგინალური გეომეტრიული წყობითა და განსხვავებული ფერით. იმისთვის, რომ ერთი შეხედვით „ცივ“ გარემოში მეტი სიმყუდროვე შევიტანოთ, ზოგიერთი დიზაინერი გვთავაზობს მცირე ზომის ავეჯის შეტანას (სკამი, დაბალი მაგიდა..) სათავსოში, წმინდა დეკორატიული დატვირთვით.