ვინტაჟური სტილის მოყვარულებს კი ეს წელი სასიამოვნო ტრენდებს სთავაზობს: ეს არის ტრადიციული აქსესუარები, რომლებიც გაფორმებულია ვარდისფერითა და პასტელური ზღვისფერი მწვანით. თქვენს ვინტაჟურ ნაძვის ხეზე აუცილებლად უნდა იყოს ამფერი, სხვადასხვა ზომისა და ფორმის ბურთები, ანგელოზის ფიგურები, მონეტები, ჩიტები და სხვა. ასევე ამ სტილს ვერცხლისფერი უყვარს. წელს კი ეს უკანასკნელი ოდნავ ნაცრისფერში გადადის.

თუ თქვენი სახლის ინტერიერი მოდერნულია, მაშინ მეტალისფერები დაგჭირდებათ. 2018 წელს მუქი იასამნისფერის, ვარდისფერისა და ნაცრისფერის ტრენდულობა იზრდება. თუ ნაძვის ხის სათამაშოებს ამ ფერებში გადაწყვეტთ, გახსოვდეთ, რომ მათ რბილი მატერიებიც უნდა შეუსაბამოთ. ეს დაბალანსებაში დაგეხმარებათ.

2017 წელი სიმწვანის წელი იყო. ეს ფერი მომავალ წელსაც არ დაკარგავს პოპულარობას. თუ მწვანე ძალიან გიყვართ, მისი და ცოტაოდენი ვერცხლისფერის კომბინაცია არაჩვეულებრივ შედეგს მოგცემთ. ასევე მოდურად გამოიყურება მწვანე ნაძვის ხის სათამაშო ბურთებზე დატანებული წითელი-თეთრი სქემა. მწვანისა და ოქროსფერის შეხამებით კი 60-იან წლებს, არტ დეკოსა და ბაროკოს გააცოცხლებთ.

მომავალ წელს, დიზაინერები არც ლურჯ ფერს ივიწყებენ. მუქი ლურჯისა და ოქროსფერის ტანდემი - არაჩვეულებრივად გამოიყურება. თუ ინტერიერის ატმოსფეროში ცოტაოდენი ნოსტალგიური ელემენტების შემოტანა გსურთ, ლურჯ ფერში შესრულებული ვარსკვლავების დეკორი აუცილებლად დაგეხმარებათ, ცოტაოდენი გლიტერი კი საახალწლო განწყობას შექმნის.