თქვენი ნაკვეთის მორთვის დროს ზედმეტად ნუ გამოიყენებთ მკვეთრ და მყვირალა ფერებს. ქოთნების დიზაინი არ უნდა იყოს მასში მოთავსებულ ყვავილებზე უფრო შესამჩნევი. მიმზიდველი და ჰარმონიული იქნება, თუ თქვენი ლარნაკები და ქოთნები კრემისფერის, თეთრის, ტერაკოტას, ყავისფერის მშვიდი და ნათელი ელფერის მატარებელი იქნება. თუ მაინცდამაინც დეკორირებული ქოთანი შეარჩიეთ, მაშინ ის რაც შეიძლება ლაკონური და ადგილობრივ ლანდშაფტთან შესაბამისი უნდა იყოს.

ბაღის დეკორატიული ქოთნების არჩევისას მნიშვნელოვანია ყურადღების იმაზე გამახვილება, თუ რისგან არის დამზადებული ლარნაკი. ყველაზე გავრცელებული მასალა - ბეტონი, ქვა და პლასტმასია. არც თუ ისე იშვიათად იყენებენ თიხას. მისი მოქნილობა საშუალებას იძლევა ექსპერიმენტები ჩაატარო უნიკალური ტექსტურებითა და ფორმებით, მაგრამ ამავდროულად მათი ზედაპირი დაფარული უნდა იყოს სპეციალური ჭიქურით, რადგან შეინარჩუნოს ტენიანობა და ტემპერატურის ცვალებადობის მიმართ მდგრადობა.

ნამდვილი ან ხელოვნური ქვისგან დამზადებული ვაზები, როგორც წესი ქვის დასადგმელზე, სპეციალურ საყრდენზე იდგმევა და ლამაზი რელიეფური ნახატებით ფორმდება. მათი მთავარი უპირატესობა გამძლეობა და თვალში მოსახვედრი დეკორატიულობაა. ასევე, ისინი არაჩეულებრივად ინარჩუნებენ ტენიანობას, რაც ხელს უშლის ნიადაგის სიმშრალეს. რაც შეეხებათ ბეტონის ლარნაკებს, მათ ძირითადად დიდი ბაღების მოსართავად გამოიყენებენ, რადგან ისინი უმეტესწილად დიდი ზომის და ტევადობისაა. ბეტონისგან დამზადებული ქოთნები ხანგრძლივად ემსახურებიან ბაღს, რადგან ისინი წყლის და ტემპერატურის ზემოქმედების მიმართ მდგრადები არიან. დამატებითი არმატურა კი, რომელსაც მისი შემქნისას იყენებენ, მათ კიდევ უფრო მეტ გამძლეობას მატებს.

ბაღის გაფორმების უფრო ეკონომიური ვარიანტი პლასტმასის ლარნაკების გამოყენებაა. ისინი ძირითადად მკვეთრ, ნათელ ფერებში გვხვდება და მშვენიერი დეკორატიული მასალაა. მათი მთავარი უპირატესობა დაბალი ფასი და მობილურობაა. მცირე წონის გამო მათი გადაადგილება ძალიან მარტივია. საინტერეოა ისიც, რომ პლასტმასის მასალა იმიტაციის საშუალებას იძლევა. თუ თქვენ ბუნებრივი მატერიებისგან დამზადებული ქოთანი გიზიდავთ, შეგიძლიათ ის პლასტმასის ქოთანი აირჩიოთ, რომელსაც მსგავსი ზედაპირი აქვს.