ცხოველებს ნამდვილად აქვთ შესაძლებლობა თქვენს ჯანმრთელობაზე გავლენა მოახდინონ, რაც გრძელვადიან პერიოდში დადებითად აისახება ადამიანზე. დამტკიცებულია, რომ კატებთან ურთიერთობა ამცირებს წნევას და სტრესს, ქოლესტერინისა და ტრიგლიცერიდების დონეს ორგანიზმში. ხოლო ძაღლის პატრონებს, გულის შეტევის შემდეგ გადარჩენის მეტი შანსი აქვთ. კვლევებმა დაადასტურეს, რომ ცხოველების წყალობით ჩვენ გვიუმჯობესდება იმუნური სისტემა და ნაკლებად ალერგიულები ვართ. ბავშვები, რომლებიც ცხოველებთან ერთად იზრდებოდნენ, გამოირჩევიან ძლიერი იმუნური სისტემით და ნაკლები ალერგიულობით.

ცხოველების წყალობით, გვინდა თუ არა, ჩვენი ცხოვრების სტილიც უმჯობესდება. არ აქვს მნიშვნელობა ძაღლის მფლობელი ბრძანდებით თუ კატის, როდესაც შინაურ ცხოველის პატრონი ხართ, მათზე ზრუნვა გიწევთ და თქვენ სწორი რეჟიმით იწყებთ ცხოვრებას. ის აქტივობები, რომლის კეთებაც ცხოველთა მოვლისათვისაა საჭირო, იქნება ეს ძაღლის გასეირნება თუ კატისთვის საჭმლის მირთმევა, თქვენს ჯანმრთელობაზე ნამდვილად დადებითად აისახება.

შინაური ცხოველები არამარტო ფიზიკურ ჯანმრთელობაზე ზრუნავენ, ისინი ჩვენ გვაბედნიერებენ. დაღლილი დღის შემდეგ ყოველთვის სასიამოვნოა სახლში დაბრუნება და საყვარელ ცხოველთან ჩახუტება, მისი მოფერება. ცხოველები ხომ ყოველთვის დიდი სიყვარულით გველიან. თქვენ თავს მარტოსულად არასდროს, იგრძნობთ როდესაც სახლში საყვარელი არსება გელოდებათ, რომელიც გრძნობს და განიცდის თქვენთან ერთად და ცდილობს დაძაბული დღის შემდეგ ცხოვრება გაგიხალისოთ. სტრესისა და დეპრესიის შემცირება კი დღესდღეობით ნამდვილად აუცილებელია.

ცხოველის ყოლა თქვენ სოციალურ ცხოვრებაზეც აისახება. მაგალითად ძაღლის გასეირნებისას შეიძლება ბევრი სხვა ადამიანი გაიცნოთ. საერთო ინტერესი, მითუმეტეს თუ ეს ინტერესი კეთილი და გონიერი არსებაა, აუცილებლად აახლოებს ადამიანებს. გახსოვდეთ, რომ ცხოველებზე ზრუნვით ჩვენ ძალიან ბევრ რამეს ვსწავლობთ. განსაკუთრებით მაშინ, თუ ისინი ბავშვობიდან გვყავს. ბავშვები, რომლებსაც შინაური ცხოველები ყავთ უფრო კომუნიკაბელურნი და მზრუნველნი არიან. ასე, რომ თუ თქვენი პატარა ცხოველის ყოლას გთხოვთ ან თქვენც გინდათ იზრუნოთ რაიმე არსებაზე არ დაიზაროთ და გაამდიდრეთ ოჯახი ახალი წევრით, რომელსაც აუცილებლად ეყვარებით და იზრუნებს თქვენზე.