სკოლის მოსწავლეებისთვის ხელოვნური განათება დიდი მნიშვნელობის მატარებელია. ამიტომ, აქ მხოლოდ ერთი სანათური არ გეყოფათ. სინათლის გავრცელება სწორად რომ უზრუნველყოთ, გამოიყენეთ ჭერის სანათურები. ასევე მნიშვნელოვანია პერიფერიული განათების დამონტაჟებაც. მაგიდის სანათური კი სასწავლო მაგიდისთვის განუყოფელი ნაწილია. საწერი მაგიდა ისე უნდა დადგათ, რომ მან შუქის გავრცელებას ხელი არ შეუშალოს. მაგალითად, როცა ბავშვი წერს, მისი ხელებით სინათლე არ უნდა „დაიხუროს“. ამიტომ, მაგიდის სანათური მარცხენა მხარეს დადგით. გაითვალისწინეთ, რომ სინათლე მსუბუქი უნდა იყოს, რათა თვალების დაღლილობა არ გამოიწვიოს.

უდავოა, რომ სკოლამდელი ასაკის ბავშვებისთვის განკუთვნილი განათება რადიკალურად განსხვავდება მოსწავლეების განათებისგან. ეს უკანასკნელი უნდა იყოს კომფორტული როგორც თამაშის, ასევე წიგნების კითხვის დროს. ყვითელ, თბილ განათებას დამამშვიდებელი ეფექტი აქვს. რბილი, დიფუზიური, ცენტრალური განათება კი ბავშვის მგრძნობიარე თვალებს არ გადატვირთავს.

ჭერზე განთავსებული სანათურები შეგიძლიათ ორ ნაწილად გაყოთ: ცივად და თბილად. ამისთვის ორი ღილაკი გამოიყენეთ. ერთ-ერთი მათგანი იმ სანათურებს გააქტიურებს, რომლებიდანაც თბილი სინათლე გამოდის, მეორე კი - მათ, რომლებიდანაც ცივი სინათლე გამოდის.

ჭაღისა თუ სანათურების დამონტაჟების დროს, აუცილებლად გაითვალისწინეთ უსაფრთხოების ზომები. მიაქციეთ ყურადღება ფორმას, მატერიებს, ხარისხის სერტიფიკატს. მყიფე და თხელი მინა შეიძლება მარტივად გატყდეს და თქვენი პატარა დააზიანოს. ყველაზე ოპტიმალური ვარიანტი შემდეგი მასალებია: მეტალი, ხე, ბამბუკი, ორგანული მინა, როტანგი და სხვა ეკოლოგიური მატერიები. ტექსტილის სანათურები ქმნის სითბოს და კომფორტს. თუმცა პრაქტიკული თვალსაზრისით, მათი მოვლა საკმაოდ რთულია. ქსოვილში მუდმივად გროვდება მტვერი, რისი გაწმენდაც დიდ ენერგიას მოითხოვს. არ გირჩევთ პლასტმასის სანათურების შეძენას. ისინი მწვავე ტოქსკურ ნივთიერებებს გამოყოფენ, რამაც შეიძლება ალერგია გამოიწვიოს. ასევე პლასტმასი მარტივად დნება მაღალ ტემპერატურაზე.

საბავშვო ოთახში სანათურების არჩევისას, აუცილებელია მისი დიზაინიც გავითვალისწინოთ. მოერიდეთ რთულ კონსტრუქციებს. საბავშვო ინტერიერი რაც უფრო მარტივია, მით უფრო უკეთესია. ასევე თავი შეიკავეთ უცნაური ფერებისა და მუქი დიზაინისგან. უმჯობესია, თუ სანათურების დიზაინს თქვენს ბავშვთან ერთად შეარჩევთ.