როდესაც საახალწლო დეკორირებაზე ვსაუბრობთ არ შეიძლება გირჩების დავიწყება. გირჩი ერთ-ერთი საუკეთესო მასალაა მშვენიერი ნამუშევრების შესაქმნელად. მისი შეძენაც კი არაა საჭირო, გაისეირნეთ ბუნებაში და მას ნებისმიერ ადგილას იპოვით. გირჩების, მავთულის და წებოს გამოყენებით შეგიძლიათ მშვენიერი საშობაო გვირგვინის დამზადება. დაგრიხეთ მავთული მრგვალად და მიაწებეთ ზევიდან გირჩები. შეგიძლიათ გირჩები თეთრად შეღებოთ და ასე, მათ დათოვლილ ეფექტს შესძენთ. ძალიან მარტივია მათი გამოყენებით ნაძვის ხის სათამაშოების დამზადებაც. გამოიყენეთ თექა, ბამბა ფერადი ძაფები და ლენტები და გააფორმეთ თქვენი ნაძვის ხე ორიგინალურად.

იმისათვის რომ სახლს მეტი მყუდროება და სადღესასწაულო ელფერი შემატოთ გააფორმეთ ის ნაძვისა და წიწვის ბუნებრივი ტოტებით. რა თქმა უნდა, ხეებზე ტოტების დამტვრევას არ გთხოვთ, თუმცა თუ ბუნებაში სეირნობისას ხიდან ჩამოვარდნილ ტოტებს გადააწყდებით აუცილებლად წამოიღეთ სახლში, მათი დახმარებით თქვენი სახლი ნამდვილად იქნება გამორჩეული. შეგიძლიათ პატარა ტოტები სუფრის მოსართავადაც გამოიყენოთ. დიდებით კი კედლები, ჭაღები და ბუხარი მორთოთ. ტოტებს, სურვილისებრ დაუმატეთ პატარა ფერადი ბანტები ან მძივები, ასე ისინი უფრო თვალშისაცემი იქნება.

ძალიან საინტერესო სათამაშოების დამზადება შეგიძლიათ საქსოვი ძაფებისა და წებოს გამოყენებით. სხვადასხვა ფერის საქსოვი ძაფები ამოავლეთ წებოში და შემოახვიეთ სასურველ ზომაზე გაბერილ ბუშტებს. მიეცით მათ, ოვალური ან მრგვალი ფორმა. ძაფები კარგად გააშრეთ, შემდეგ კი ბუშტები დაჩუტეთ. შექმნილ სათამაშოებს შეგიძლიათ, ბრჭყვიალები მოაყაროთ, ან პატარა ბისერები მიაკრათ. მთავარია თქვენი ფანტაზია, მონდომება და ყველაფერი მარტივად გამოგივათ. ჩართეთ ამ კრეატიულ პროცესში სხვა ოჯახის წევრებიც და ერთად დაამზადეთ სასურველი საახალწლო დეკორაციები. ასე ეს საქმიანობა უფრო სასიამოვნოც იქნება.