ალბათ, ბევრი ჩვენგანი საკუჭნაოს დიდ ყურადღებას არ აქცევს და მას, სახლის არც თუ ისე მნიშვნელოვან ნაწილად თვლის, თუმცა ეს დიდი შეცდომაა. საკუჭნაო ის ადგილია, რომლის კარგად მოწყობისა და ორგანიზების შემთხვევაში მნიშვნელოვნად გვიმსუბუქდება ყოველდღიური საქმეები. თუ თქვენ სამზარეულოსთან ახლოს, პატარა სივრცე გაქვთ, ნამდვილად გაგიმართლათ, რადგან აქ კომფორტული საკუჭნაოს მოწყობა თავისუფლად შეგიძლიათ. თუმცა საკუჭნაოზე უარი არც მათ უდნა თქვან, ვინც პატარა ფართის საცხოვრებელში ცხოვრობს. შეიძლება საკუჭნაოსთვის პატარა ოთახი ვერ გამოყოთ, თუმცა ამ შემთხვევაში თქვენ შეგიძლიათ, თაროების დამონტაჟება სამზარეულოში. ეცადეთ მაქსიმალურად აითვისოთ კუთხის ნაწილი, ამით დაკარგულ სივრცეს გამოიყენებთ. ასევე შეგიძლიათ ძველი კარადის შიგნიდან გადაკეთება და მისი კომპაქტური თაროებით მოპირკეთება. თუ თქვენ ახლა იწყებთ რემონტს და პატარა სივრცის სამზარეულო გაქვთ, გირჩევთ მოძრავი თაროების დამონტაჟებას, რომლის დამალვასაც ავილად შეძლებთ.

არ აქვს მნიშვნელობა იმას, თუ რა ზომისაა თქვენი საკუჭნაო - ის აუცილებლად კარგად უნდა ნიავდებოდეს. კარგი სავენტილაციო სისტემა, დაბალი განათება და დაბალი ტენიანობა - აი, რა არის საჭირო საკუჭნაოში. რაც შეხება თაროებს, ეცადეთ ისინი ფართე, მაღალი და გამძლე იყოს, რადგან მასზე შემოდებული პროდუქტის სიმძიმეს გაუძლოს. გამოიყენეთ დაწნული კალათები, ან პლასტმასის დიდი კონტეინერები მშრალი პროდუქტის და ქილების შესანახად. ეს საკუჭნაოს თვალისთვის უფრო მიმზიდველს გახდის, თქვენ კი პროდუქტის პოვნა გაგიადვილდებათ. არ დაგავიწყდეთ საკუჭნაოს კარების გამოყენება. კარებზეც შეგიძლიათ, პატარა თაროების ჩამოკიდება და სხვადასხვა ნივთების შენახვა. იმისათვის, რომ საქმე გაიმარტივოთ პროდუქტი გამჭვირვალე კონტეინერებში, ან მინის ქილებში შეინახეთ, ასე ადვილად მიხვდებით, თუ რამდენი დაგრჩათ და როდის უნდა შეავსოთ ისინი. კარგი იქნება თუ პროდუქტსაც გამოყენების მიხედვით დავახარისხებთ. მაგალითად ის პროდუქტები, რომლებსაც ყოველდღიურად იყენებთ, ან რომელიც უფრო მალფუჭებადია ახლოს გამოსაჩენ ადგილას დააწყვეთ. გახსოვდეთ, რომ საკუჭნაოში შეგიძლიათ იმ ჭურჭლის შენახვაც, რომელიც ზედმეტ ადგილს იკავებს თქვენ სამზარეულოში. იმისათვის, რომ თავი ავარიდოთ მწერებს, რომლებსაც ძალიან უყვართ მსგავსი ადგილები შეგიძლიათ საკვებ პროდუქტთან დაფნის, ან წიწაკის ფოთლების მოთავსება. ეს ბუნებრივი საშუალებები მწერებს აფრთხობს და ამავდროულად, მათი საკვებთან მოთავსება სრულიად უსაფრთხოა.