თუ ბაღი გაქვთ, შემოდგომის მოსვლასთან ერთად, მისი დიზაინის შეცვლაზე იფიქრეთ. ამ დროს ბაღი თავის ჩვეულ ფერადოვან სახეს კარგავს და ვიზუალურად არაესთეტიკურადაც კი გვეჩვენება ხოლმე. მიუხედავად იმისა, რომ შემოდგომა თავისი მრავალფეროვანი „პალიტრით“ გამოირჩევა, ძნელია ზუსტად და ჰარმონიულად დავაკავშიროთ ერთმანეთს მცენარეები, ყვავილები და შემდეგ ისინი ბაღის დიზაინს შევუსაბამოთ. სანამ უშუალოდ ბაღის მოწყობაზე გადახვალთ, მანამდე ფერთა გამა შეარჩიეთ, რომელიც მთელი ექსტერიერის გამყოლი ხაზი იქნება. ეს ფერები შეიძლება იყოს: ოქროსფერი-ყვითელი-ფორთოხლისფერისა და მწვანეს ნებისმიერი ჩრდილის ჯგუფიდან. ბაღის შემოსასვლელისთვის კი ჩალისფერი გამოიყენეთ. არ დაივიწყოთ ფოთლების მრავალფეროვნება და ლამაზი კლუმბები სხვადასხვა ფერის ფოთლებისა და ყვავილებისგან შექმენით. მაგალითად, თუ ქრიზანთემებს აირჩევთ, ეს ზაფხულს გაგახსენებთ. მათი ყვითელი, ფორთხოსლიფერი და იასამნისფერი ჩრდილებიც კი ნებისმიერი ადამიანის ყურადღებას მიიპყრობს. შემოდგომისთვის კიდევ ერთი არაჩვეულებრივი არჩევანი დეკორატიული კომბოსტოა. რეალურად, ეს ფოთლოვანი კომბოსტო სიცივის მოახლოებასთან ერთად ბევრად ლამაზი ხდება. ამიტომ ის იდეალურია ამ სეზონისთვის. მისი ღია იასამნისფერი არაჩვეულებრივ კონტრასტს ქმნის ნარინჯისფერ და სხვა სახასიათო ფერებთან ერთად. თუ თქვენს ბაღში მწვანე ფერი დომინირებს, დიზაინში თბილი ფერების მქონე მცენარეები შეიტანეთ. ამის არაჩვეულებრივი მაგალითი კროტონია. ყვითელი, მწვანის "ზღვაში“, ეფექტურთან ერთად, საკმაოდ ჰარმონიულიცაა. დიზაინერები თვლიან, რომ საშემოდგომოდ, ბილიკის ირგვლივ მაღალი ბალახის დარგვა, სივრცეს ალამაზებს და ამრავალფეროვნებს. თითქმის ყველა თანხმდება, რომ ექსტერიერის დიზაინში ფორთოხლისფერის დამატება, ზაფხულის მოგონებებს აღძრავს.