საზღვაო სტილის მთავარი საიდუმლო - უხვი სინათლეა. ბევრი ფანჯარა, მათ შორის სახურავზე დამონტაჟებული, მინის კარებთან ერთად სახლს დღის შუქით აავსებს. თუმცა თუ ამ ვარიანტის განხორციელება არ შეგიძლიათ, შანდლები და სანათურები სცადეთ. ფანჯრები უნდა იყოს ძალიან დიდი, უბრალო და იმდენად მარტივი, რომ ოთახში შემოსულ სინათლეს ხელს არ უშლიდეს. ოთახის გასანათებლად შეგიძლიათ სხვადასხვა ხრიკებიც გამოიყენოთ, მაგალითად, ფანჯრის წინ სარკე დადგათ. გაფრთხილდით, ზედმეტად ბევრი ამრეკლავი ნივთები არ გამოიყენოთ.

მყიფე და სუფთა ქსოვილები საზღვაო სტილისთვის დამახასიათებელი ატრიბუტია. ბამბის ფარდაგები თუ მიტკლის ფარდები კომფორტულ და მყუდრო გარემოს შექმნის. რაც შეეხება ფერებს, ალბათ შეამჩნევდით, რომ თეთრი საზღვაო სტილის ინტერიერში, ყველაზე დიდ დატვირთვას ატარებს. მაგრამ თუ ეს ყველაფერი ზედმეტად ერთფეროვნად გეჩვენებათ, შემდეგი ფერები დაიხმარეთ: კრემისფერი ან ჩალისფერი. ყვითელი ფერის დამატება კი მზიან სანაპიროს მოგაგონებთ. ცისფერი, ცივი აკვარელის საღებავები და ფირუზისფერი, საზღვაო სტილის ინტერიერში, ყველაზე შესაბამისი ჩრდილებია. გირჩევთ, რომ არ გამოკვეთოთ ორ ფერზე მეტი. არ გამოიყენოთ ბრწყინავი ან ამრეკლავი ზედაპირი, უმჯობესია ის გლუვი და დახვეწილი იყოს.

ხალიჩების, ავეჯისა თუ აქსესუარების შერჩევისას გაითვალისწინეთ, რომ ისინი ორგანული მატერიებისგან უნდა იყოს დამზადებული, მაგალითად, როგორებიცაა ზღვის ბალახი, ჩალა ან ჯუთი. ინტერიერში ბუნებრივი სითბო და სანაპიროს ფაქტურები შემოიტანეთ. ოთახისთვის ზღვის კონცეპტის მქონე დეკორაციების დამატება შეგიძლიათ. ორგანულ ზედაპირს კონტრასტული ნივთი შეუხამეთ. მაგალითად, მოწნული ყავის მაგიდის გვერდით სიზალის ხალიჩა მეტისმეტია, მაგრამ გლუვი მაგიდა ნაქსოვი, რბილი სავარძლებით - ეს ზუსტად ისაა, რაც გჭირდებათ. რადგანაც სანაპირო გახსნილი სივრცეა, ამავე სტილის ინტერიერშიც დიდი სივრცე უნდა იგრძნობოდეს. ავეჯითა და აქსესუარებით გადატვირთული ოთახი, მშვიდ ატმოსფეროს დაარღვევს. თუ საზღვაო ინტერიერის მქონე სახლს დაათვალიერებთ, შეამჩნევთ, რომ ის ცოტათი ცივია, არ აქვს ბევრი კარი და შიგნით დიდი სივრცე გხვდებათ. ხშირად ვერანდა, ფაქტობრივად, ინტეგრირებულია სტუმრების ოთახთანაც კი.