ალპური წარმოშობის გამო, შალეს ინტერიერის დიზაინს სიმარტივე და თბილი ატმოსფერო ახასიათებს. მთავარ შტრიხად კი ნატურალური მატერიები გვევლინება. არ არსებობს სხვა სტილის მიმდინარეობა, რომელშიც ამდენ ხის ნაკეთობასა და ბუნებრივ ქვას შეხვდებით, რამდენიც შალეს სტილის ინტერიერშია. ბევრ მომხმარებელს ალპური სტილი იმდენად შეუყვარდა, რომ მსგავსი ატმოსფეროს ელემენტების გადატანას ქალაქურ კორპუსებშიც ცდილობს ხოლმე. 

 ალპური სტილის სახლებში მისაღები ოთახი ამგვარად არის მოწყობილი: ხალიჩის ნაცვლად კედლებზე ცხოველების ფიტულებსა და იატაკზე ბეწვის ტყავებს შეხვდებით, უმთავრეს ატრიბუტად კი ბუხარი ითვლება. თუ სხვა ზამთრის სახლებში ის მეორეხარისხოვანია, აქ მას მთავარი პოზიცია უკავია - ის ყურადღების ცენტრშია. ცხოველების ფიტულები ზუსტადაც ბუხრის ზემოთ არის წარმოდგენილი - ეს ალპური სტილის ჩვეულებრივი ელემენტია. დღესდღეობით, ბუხრის ზევით ან გვერდით ტელევიზორსაც შეხვდებით. ეს სივრცის დაზოგვის პრაქტიკული საშუალებაა.

შალეს სტილის მისაღებ ოთახში აუცილებლად შეხვდებით უზარმაზარ ფანჯრებს, მაღალ ჭერს, ხის სვეტებს, ხის იატაკს, ლამაზ სანათურებს და მყარი ხისგან დამზადებულ ავეჯს. თუკი ამ უკანასკნელზე ვლაპარაკობთ, შალეს ინტერიერისთვის დამახასიათებელია მასიური ტახტები და ტყავის სავარძლები. ეს ბამბის ან ხავერდის უარყოფას არ ნიშნავს. მთავარია ტექსტილის სინთეზური კომპონენტი თვალში არ მოხვდეს მნახველს და წინა პლანზე არ გადმოვიდეს. შალეს სტილის მისაღებ ოთახში დიდი მნიშვნელობა განათების სისტემას უკავია. ერთი მხრივ, ის აქ ინტიმურ ატმოსფეროს ქმნის, მეორე მხრივ, კი აქ მცხოვრებს იმის შესაძლებლობას აძლევს რომ ბუხართან წიგნი წაიკითხოს. მისაღები ოთახი ყოველთვის გადაჰყურებს ადგილობრივ პეიზაჟებს.

შალეს სტილის საძინებლის მთავარი ელემენტი კვლავ ბუხარია. ძველ დროში საცხოვრებლად ეს აუცილებელი ატრიბუტი იყო, დღეს კი ის პრაქტიკულთან ერთად, დეკორატიულ, ესთეტიკურ ფუნქციასაც ატარებს. საშუალო ზომის სახლებში ხშირად ორსართულიანი საწოლები დგას. საძინებლის მოწყობისას დიდი ყურადღება ქსოვილს ექცევა. ფარდები, როგორც წესი, ბუნებრივ ქსოვილზე მზადდება. საწოლის გადასაფარებლად კი ბამბის ან ბეწვის მასალას იყენებენ ხოლმე. შალეს სტილი საძინებელი თავისი მასიურობით გამოირჩევა, ამიტომ აქ საწოლისა და გარდერობის გარდა, დიდი დასასვენებელი ადგილიცაა მოწყობილი: ბუდუარით, რამდენიმე სავარძლითა და ჟურნალის მაგიდით.