აქსესუარები, ქსოვილები და დეკორისთვის საჭირო სხვადასხვა ნივთები შესაძლებელია მარტივად შეუთავსოთ მოდას, სეზონს და ხასიათს, ან სულაც შეცვალოთ და ახალი ნივთით ჩაანაცვლოთ. თუმცა ჭაღების და სანათების შემთხვევაში ყველაფერი ასე მარტივად არ არის. როგორც წესი, რემონტიდან რემონტამდე ჩვენ, ჭაღებს და სანათებს არ ვცვლით. როდესაც მათ ვყიდულობთ ისინი სამუდამოდ იმკვიდრებენ ადგილს ბინაში. თუმცა, თუ თქვენ ისეთ ადამიანს მიეკუთვნებით, რომელიც მუდმივად ცვლილებებისკენ ისწრაფვის და არ უყვარს ერთფეროვნება ინტერიერის დიზაინში, გთავაზობთ მარტივ და ორიგინალურ გზას იმისთვის, რომ თქვენი ჭაღები განაახლოთ და დრო სასიამოვნოთ გაატაროთ შემოქმედებით პროცესში.

ჭაღი ბუმბულებით საკმაოდ ორიგინალური და საინტერესო გადაწყვეტაა თანამედროვე ინტერიერის დიზაინში. ამ ჰაეროვანი და ლამაზი მორთულობის გაკეთება ძალიან მარტივად შეგიძლიათ. თქვენ დაგჭირდებათ ქაღალდი, წებო, ქაღალდის ჭაღი და მაკრატელი. გადაკეცეთ ქაღალდები თანაბრად, ოთხჯერ. გამოჭერით ბუმბულის ფორმა, შემდეგ კი გვერდებზე ჩაჭერით. ბუმბულები თანაბრად მიაწებეთ ქაღალდის, 4-4 სანტიმეტრის გამოტოვებით. თუ თქვენ ქაღალდის ზედმეტად უბრალოდ გეჩვენებათ, შეგიძლიათ იგივე პრინციპით ნამდვილი ბუმბული გამოიყენოთ.

თუ რეტრო სტილის მოყვარული ხართ, მაშინ აუცილებლად სცადეთ ძველი სანათის განახლება, ჩვენი რჩევების მიხედვით. თქვენ დაგჭირდებათ სანათის კარკასი, სხვადასხვა ფერის და დეკორატიული თასმა. თასმები მორიგეობით მიაბით კარკასის ქვედა ნაწილს, შემდეგ კარგად გაჭიმეთ და ზემოთ გაკვანძეთ. ასე განაგრძეთ მანამ, სანამ სამივე ფერს არ მორჩებით. შემდეგ კი უკუღმა ჩამოკიდეთ ჭერზე.

არყის ხის ქერქი საკმაოდ საინტერესო მატერიაა ხელნაკეთი სანათის შესაქმნელად. იმისათვის რომ სანათი გააკეთოთ არ ღირს ხის გატყავება, საკმარისია არყის ხის ჩამოვარდნილი მერქანიც. არყის ხის მერქანი საკმაოდ ადვილად აალებადია, ამიტომ გირჩევთ ის ჯერ წყალზე დამზადებული ჰერმეტიკით დაამუშაოთ. ჰერმეტიკი ასევე დაიცავს მერქანს დახეთქვისგან და გამოშრობისაგან. იმისათვის რომ სანათმა ფორმა არ დაკარგოს, მერქნის ბოლოები ერთმანეთს მიაწებეთ, გაკერეთ, ან დააფიქსირეთ ბაწრით. თუ სანათის ხშირად გამოყენებას აპირებთ, მაშინ წებოს ვარიანტი არ გამოგადგებათ, რადგან გამუდმებული გაცხელებით ის დაკარგავს თავის თვისებებს.