საქალაქო, იგივე ურბანული პარკები ქალაქში არსებული ტერიტორიაა, რომელიც ადგილობრივ მაცხოვრებლებსა და ვიზიტორებს რეკრეაციასა და მწვანე სივრცეებს სთავაზობს. მუნიციპალური პარკების საერთო მახასიათებელია: სპორტული მოედნები, ბაღები, ფიტნეს და სასეირნო ბილიკები, სპორტული დარბაზები, კორტები, საზოგადოებრივი საპირფარეშოები, საპიკნიკე ტერიტორიები, მოკლედ გაკრეჭილი ბალახი და ა.შ.  ამ საერთო მახასიათებლების არსებობა კი დამოკიდებულია ბიუჯეტზე და ბუნებრივ რესურსებზე და იქმნება ადგილობრივი ხელისუფლების დაფინანსების საფუძველზე.

ურბანული პარკები, თავისი დანიშნულებით, შეგვიძლია ორ კატეგორიად დავყოთ: აქტიური და პასიური რეკრეაციული ზონები. აქტიურ დასვენებას აქვს ურბანული მახასიათებელი და მოითხოვს ინტენსიურ განვითარებას. ის ძირითადად მოიცავს სათამაშო მოედნებს, საცურაო აუზებს, კორტებს, სკეიტპარკებს, ფიტნეს ადგილებს. მოკლედ რომ ვთქვათ, ისეთ ადგილებს, სადაც ფიზიკურად აქტიური დატვირთვის მიღებაა შესაძლებელი. იმისათვის, რომ ასეთ პარკებში უზრუნველყოფილი იყოს გუნდური სპორტით დაკავება და ხალხმრავალი შეკრებები, აუცილებელია ინტენსიური მენეჯმენტის წარმართვა და მაღალი ხარჯების გაწევა. რაც შეეხება პასიურ რეკრეაციულ ადგილებს, ისინი გვთავაზობენ დაბალი ინტენსივობის დასვენებას. ის ხაზს უსვამს პარკის ღია სივრცეს და იძლევა ბუნებრივი ჰაბიტატის შენარჩუნების საშუალებას. ასეთი პარკები საჭიროებს დაბალი ინტენსივობის განვითარებას და მოვლას. აქ საკმარისია საპიკნიკე ადგილების, მოსასვენებლი სკამებისა და ბილიკების არსებობა. როგორც წესი მოითხოვს მცირე მენეჯმენტს და შეიძლება უზრუნველყოფილი იყოს ძალიან დაბალი ხარჯებით.

როგორც წესი პარკების დაგეგმარება და განვითარება ყველა ქალაქში თავისებურად ხდება და დამოკიდებულია სოციალურ და ეკონომიკურ ფაქტორებზე. პირველ რიგში, აუცილებლად აღსანიშნავია, რომ პარკის დაგეგმარებისას გათვალისწინებული უნდა იყოს ადგილობრივი მაცხოვრებლების მოთხოვნილებები და საჭიროებები. რა თქმა უნდა, ყველა პარკი უნდა ასრულებდეს მის ძირითად როლს თუმცა, საზოგადოების საჭიროებიდან გამომდინარე, შესაძლებელია კონცენტრირება მოხდეს გარკვეულ ასპექტებზე. მაგალითად: პარკებში სათამაშო მოედნების, საბავშვო ატრაქციების უხვ რაოდენობაზე, ან საპიკნიკე ადგილების სიჭარბეზე და ა.შ. დღეს, თბილისში სულ უფრო ცოტა თავისუფალი ადგილია დარჩენილი, სადაც შესაძლებელი იქნება საქალაქო პარკების მოწყობა და განვითარება. სწორედ ამიტომ, თანამედროვე ცხოვრების რიტმიდან გამომდინარე, მნიშვნელოვანია, ისეთი მწვანე სივრცეების შექმნა, სადაც პასიური და აქტიური რეკრეაცია ერთდროულად იქნება შესაძლებელი. ეს ყველაფერი კი სწორი და პროფესიონალური დაგეგმარების გარეშე წარმოუდგენელია.

საქალაქო პარკები, სწორი პროექტირების შემთხვევაში, შესაძლოა იქცეს ყველაზე სასურველ თავშეყრის ადგილად მთელს ქალაქში. პარკები უდიდეს როლს თამაშობენ კულტურის მიწოდების, ხელშეწყობისა და განვითარების საკითხებში. საზოგადოებისა და ეკონომიკის განვითარებაზე, ინდივიდუალურ და მთლიანი საზოგადოების ჯანმრთელობაზე, ბუნებრივი გარემოს შენარჩუნებაზე და ტრანსპორტზე, რის შესახებაც დეტალურად ვისაუბრებთ შემდეგ სტატიაში.