და რა უნდა ვქნათ ჩვენ იმისათვის, რომ ეს უარყოფითი პროცესი შევაჩეროთ? გვინდა თუ არ გვინდა დიდხანს ჯდომა მაინც მოგვიწევს, მაგრამ ამ ყველაფრის შემსუბუქება ნამდვილად შეგვიძლია. მთავარია გავაანალიზოთ რომ ფიზიკური აქტივობა ჩვენი ჯანმრთელობისთვის აუცილებელია. ნუ მოგერიდებათ მსუბუქი ვარჯიშების გაკეთება სამსახურში. დაარწმუნეთ თქვენი თანამშრომლებიც, რომ თქვენთან ერთად ივარჯიშონ. შეგიძლიათ აკეთოთ ბუქნები - ეს ვარჯიში ტონუსში მოიყვანს კუნთებს და გააძლიერებს სისხლის მიმოქცევას. ასევე, ტორსის დახრით მარჯვნივ და მარცხნივ, ტონუსში მოიყვანთ ზურგის კუნთებს და გაიუმჯობესებთ მოქნილობას. შეისვენეთ ყოველ ერთ საათში 5 წუთი მაინც, ეს დრო კი სიარულში და ვარჯიშში დახარჯეთ.

არც სახლში ვარჯიში იქნება ურიგო. უნდა გადავეჩვიოთ სამსახურიდან მოსვლისთანავე ტახტზე წამოჯდომას და ტელევიზორის ან კომპიუტერის ყურებას. რაც უფრო მალე აღვკვეთ ამ მავნე ჩვევას, მით უკეთესია. შეგიძლიათ სახლში პატარა სავარჯიშო კუთხე მოიწყოთ, შექმნათ ის კომფორტული გარემო, რომელიც მეტ მოტივაციას გაგიჩენთ. არაფერი სჯობს, სახლთან ახლომდებარე პარკში სეირნობას. მაქსიმალურად გამოიყენეთ ყოველი წამი, იმისათვის რომ ნელ-ნელა შეეგუოთ ფიზიკურ აქტივობას.

გახსოვდეთ, ცხოვრების მჯდომარე წესი, ადრე თუ გვიან უარყოფითად აისახება თქვენზე. ის, რომ სპორტ დარბაზში სიარულის დრო არ გაქვთ არ გამართლებთ, რადგან საქმე თქვენს ჯანმრთელობას ეხება. მცირე ვარჯიშები კი არ მოითხოვს დიდ ძალისხმევას, მთავარი მონდომებაა და ყველაფერი გამოგივათ.